Ukraina infratuzilmasiga Rossiya qo‘shinlarining ommaviy zarbalaridan so‘ng, Qo‘shma Shtatlar uni tiklash uchun ishchi guruh tuzdi. Bu haqda AQSH Savdo vazirligi xabar bermoqda.
Xabarda aytilishicha, AQSHning ikki – savdo va transport vazirliklari, shuningdek, Ukraina infratuzilma vazirligi “Ukrainaning urush davridagi muhim ehtiyojlariga va urushdan keyin infratuzilmani rekonstruksiya qilishga yo‘naltirilgan” ishchi guruh tuzdi.
Guruh o‘zining birinchi yig‘ilishini kelgusi oylarda o‘tkazishni rejalashtirmoqda, unda xususan, energiya masalalariga e’tibor qaratiladi.
Bundan tashqari, Ukrainani qayta tiklashda AQSH xususiy sektorining ishtiroki, Amerika va Ukrainaning eng yaxshi innovatsiyalarini joriy etish masalalari muhokama qilinadi.
Rossiya 9-oktabr kuni Qrim ko‘prigida ro‘y bergan portlashdan so‘ng Ukrainadagi energetika obyektlariga muntazam ravishda hujum qila boshladi. Rossiya rasmiylari portlashni uyushtirishda Ukraina razvedka xizmatlarini aybladi.
18-oktabr kuni Ukraina prezidenti Vladimir Zelenskiy Ukraina elektr stansiyalarining uchdan bir qismi Rossiya zarbalariga uchraganini aytdi. 19-oktabr kuni, uning so‘zlariga ko‘ra, yana uchta energetika obyektiga hujum qilingan.
Izoh (0)