Германиянинг BioNTech биотехнологик компанияси асосчилари 2030 йилга қадар саратоннинг бир нечта турларига қарши вакцинани рўйхатдан ўтказмоқчи эканини маълум қилди. Бундай дорини ишлаб чиқиш режалари ҳақида улар BBC’с Sunday эфирида телебошловчи Лаура Куенссбергга гапириб берди.
Эр-хотин Угур Шаҳин ва Озлем Турежи онкологик касалликларга нисбатан иммунитет ҳосил қилувчи дори устида ишлашни пандемиядан анча аввал бошлаганини, бироқ Pfizer компанияси билан ҳамкорликда COVID-19 га қарши вакцина яратиш уларни навбатдаги тиббий кашфиётга ундаганини ва фармацевтик ихтиро муваффақиятига нисбатан умидни мустаҳкамлаганини айтди.
Гап шундаки, профессор Туриэжининг фикрича, уларнинг коронавирусга қарши вакцинасига асос бўлган мРНК технологияси саратон ҳужайраларига қарши курашда қўлланилиши мумкин. Алгоритм антиген ролини бажарувчи оқсилни ҳужайрада кодлашни кўзда тутади, шу тариқа иммун тизими организмда бегона моддалар ҳосил қилувчи ҳужайралар билан курашишга ундалади. Қўпол қилиб айтганда, коронавирусга қарши вакцинани қайта мослаштириб, иммун тизимини коронавирус билан зарарланган ҳужайраларни эмас, балки саратон ҳужайраларини йўқ қилишга «ўргатиш» мумкин.
Компания лабораторияларида онкологик касалликларга қарши бир нечта вакциналар синовдан ўтказилмоқда. Биринчи навбатда иммунологлар ичак саратони, меланома ва бошқалар учун дори яратишни режалаштирмоқда.
Қийинчилик шундан иборатки, саратоннинг ҳар хил турларида ўсмалар турлича оқсиллар билан қопланган бўлади — умумий ягона вакцина яратиш имконсиз, чунки у зарур ҳужайраларнинг йўқ қилинишига кафолат бера олмайди. Бундан ташқари, ҳар қандай нотўғри қадам иммун тизимини организмдаги ҳаётий муҳим элементларни йўқ қилишга ундаши мумкин.
Турежи ва Шаҳин бўлғуси вакцина борасида оптимистик кайфиятда бўлса-да, экспериментлар муваффақияти бўйича баёнотлар беришда эҳтиёткорлик қилмоқда. COVID-19 га қарши тезкорлик билан вакцина яратиш ва ишлаб чиқариш уларни онкологияга қарши кураш соҳасида муваффақиятга яқинлаштирди. Бунинг устига, улар одам организмининг мРНК-технологияга реакцияси ҳақида кўп нарса билиб олди. Бироқ шошилинч хулосалар чиқариш керак эмас, деб таъкидлайди олимлар.
Изоҳ (0)