Академик Восит Воҳидов номидаги Республика ихтисослаштирилган хирургия илмий-амалий тиббиёт марказида яқин келажакда юрак трансплантацияси амалга оширилади. Бу ҳақда Соғлиқни сақлаш вазирлиги матбуот хизмати хабар берди.
Бугунги кунда хорижлик хирурглар билан биргаликда марказда кўплаб мураккаб операциялар ўтказилмоқда. Жумладан, Швейцариянинг Цюрих университети Торакал жарроҳлик шифохонаси мутахассислари иштирокида ўпка ва кўкс оралиғи жарроҳлиги бўлимида 3 та юқори технологик жарроҳлик амалиёти ўтказилди.
Қолаверса, Н.I.Пирогов номидаги Санкт-Петербург давлат университетининг етакчи кардиожарроҳи Максим Столяров томонидан маҳаллий жарроҳлар учун юрак ишемик касаллиги ва унинг асоратлари, инфарктдан кейинги чап қоринча аневризмаси, паст қисқарувчанлик хусусиятига эга чап қоринча билан асоратланган беморларни хирургик усулда даволаш бўйича маҳорат дарслари ўтказилган.
Юқори малакали кадрлар тайёрлаш бўйича марказнинг 20 нафар мутахассиси хорижнинг етакчи илмий марказларида тажриба орттириб қайтган. Шу билан бирга, 2022 йилда чет элдаги нуфузли илмий марказлар, жумладан, Ҳиндистоннинг Apolloн, Артемис, Аакаш Healthcarэ ҳамда Манипал клиникалари ва Туркиянинг Аcибадем касалхоналари билан ўзаро меморандумлар имзоланди.
Бугунги кунда марказ негизида 3 нафар чет эллик моҳир жарроҳ фаолият юритмоқда. Улардан бири кардиохирургия, икки нафари эса жигар трансплантацияси бўйича мутахассислар ҳисобланади.
Президентнинг 2021 йил 4 октябрдаги «Хирургия хизматини трансформация қилиш, ҳудудларда жарроҳлик амалиётлари сифатини ошириш ва кўламини кенгайтириш чора-тадбирлари тўғрисида»ги қарорига асосан РИХИАТМ негизида малакали хирург мутахассисларни тайёрлаш мақсадида мамлакатда ўхшаши бўлмаган симуляцион марказ ташкил этиш ва унда ҳудудий филиаллар мутахассисларини ўқитиш режалаштирилган.
Шунингдек, хирургия марказида яқин келажакда Ўзбекистонда илк бор юрак трансплантацияси амалиётини ўтказиш мақсад қилинган.
Изоҳ (0)