Akademik Vosit Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida yaqin kelajakda yurak transplantatsiyasi amalga oshiriladi. Bu haqda Sog‘liqni saqlash vazirligi matbuot xizmati xabar berdi.
Bugungi kunda xorijlik xirurglar bilan birgalikda markazda ko‘plab murakkab operatsiyalar o‘tkazilmoqda. Jumladan, Shveysariyaning Syurix universiteti Torakal jarrohlik shifoxonasi mutaxassislari ishtirokida o‘pka va ko‘ks oralig‘i jarrohligi bo‘limida 3 ta yuqori texnologik jarrohlik amaliyoti o‘tkazildi.
Qolaversa, N.I.Pirogov nomidagi Sankt-Peterburg davlat universitetining yetakchi kardiojarrohi Maksim Stolyarov tomonidan mahalliy jarrohlar uchun yurak ishemik kasalligi va uning asoratlari, infarktdan keyingi chap qorincha anevrizmasi, past qisqaruvchanlik xususiyatiga ega chap qorincha bilan asoratlangan bemorlarni xirurgik usulda davolash bo‘yicha mahorat darslari o‘tkazilgan.
Yuqori malakali kadrlar tayyorlash bo‘yicha markazning 20 nafar mutaxassisi xorijning yetakchi ilmiy markazlarida tajriba orttirib qaytgan. Shu bilan birga, 2022-yilda chet eldagi nufuzli ilmiy markazlar, jumladan, Hindistonning Apollon, Artemis, Aakash Healthcare hamda Manipal klinikalari va Turkiyaning Acibadem kasalxonalari bilan o‘zaro memorandumlar imzolandi.
Bugungi kunda markaz negizida 3 nafar chet ellik mohir jarroh faoliyat yuritmoqda. Ulardan biri kardioxirurgiya, ikki nafari esa jigar transplantatsiyasi bo‘yicha mutaxassislar hisoblanadi.
Prezidentning 2021-yil 4-oktabrdagi “Xirurgiya xizmatini transformatsiya qilish, hududlarda jarrohlik amaliyotlari sifatini oshirish va ko‘lamini kengaytirish chora-tadbirlari to‘g‘risida”gi qaroriga asosan RIXIATM negizida malakali xirurg mutaxassislarni tayyorlash maqsadida mamlakatda o‘xshashi bo‘lmagan simulyatsion markaz tashkil etish va unda hududiy filiallar mutaxassislarini o‘qitish rejalashtirilgan.
Shuningdek, xirurgiya markazida yaqin kelajakda O‘zbekistonda ilk bor yurak transplantatsiyasi amaliyotini o‘tkazish maqsad qilingan.
Izoh (0)