SpaceX компанияси АҚШ Мудофаа вазирлигига Украинада Starlink терминаллари фаолиятини молиялаштириш ҳақида киритган сўровини қайтариб олди. Бу ҳақда компания эгаси Илон Маск маълум қилди.
У бу ҳақда Politico нашрининг икки америкалик мансабдорга таяниб, Пентагон қурол ва ускуналар етказиб бериш учун фойдаланиладиган жамғарма орқали Starlink алоқа хизматларини узоқ муддатли истиқболда молиялаштириш имкониятини кўриб чиқаётгани ҳақидаги мақоласига жавобан айтиб ўтди.
«Аниқроқ қилиб айтсак, Украинага 25 300 та терминал жўнатилган, бироқ ҳозирги пайтда фақат 10 630 тасининг фаолияти молиялаштирилмоқда», — дея қўшиб қўйди Маск.
Аввалроқ CNN SpaceX сентябрь ойида Пентагонга мурожаат қилиб, Украинада Starlink терминаллари фаолиятини молиялаштиришни сўрагани, чунки буни ўзи бошқа амалга ошира олмаслиги ҳақида хабар берганди. Компания шу йил охиригача бўлган харажатларни 120 миллиондан зиёдга, келаси йилги чиқимларни эса 400 миллион долларга баҳолади.
Пентагонга йўналтирилган ҳужжатлар орасида Украина қуролли кучлари бош қўмондони генерал Валерий Залужний номидан яна қарийб 8 мингта Starlink терминаллари учун сўров бор эди. Компания маълумотларига кўра, Украина олган сунъий йўлдошларнинг қарийб 85 фоизи АҚШ ва Польша томонидан тўланган.
Шундан кейин Киев алоқага тўлаш йўлини топишини маълум қилди. Оқ уй Starlink Украина учун муҳим эканини тушунишларини билдириб, «Украина томони айтаётган бу эҳтиёжларни яхшироқ таъминлаш» вариантларини кўриб чиқаётганини маълум қилди.
Маск айни вақтда Россия Украинада Starlinkни «ўлдиришга» уринаётганини, чунки бу тармоқ — жанговар ҳаракатлар зонасида ишлашда давом этаётган ягонаси эканини айтди. «Уни ҳимоя қилиш учун SpaceX жуда катта ресурсларни йўналтирди. Ҳатто шундай ҳолатда ҳам Starlink барибир ўлиши мумкин», — деди бизнесмен.
Октябрь бошларида Украина ҳарбийлари ўзлари бир-бири билан алоқа қилиш, разведка маълумотларини олиш ва учувчисиз учар қурилмаларни бошқариш учун фойдаланадиган Starlink фаолиятида узилишлар бўлаётганидан шикоят қилган, деб ёзади Financial Times.
15 октябрь куни Маск SpaceX зарар кўраётган бўлса-да, терминалларни бепул етказишда давом этишига ишонтирди.
Изоҳ (0)