Британия бош вазири Лиз Трасс Консерватив партия депутатларининг чақириқларига қарамай истеъфога чиқишдан бош тортди. BBC телеканалига берган интервьюсида у ўз обрўсини сақлаб қолиш учун курашишга тайёрлигини ҳамда консерваторларни навбатдаги парламент сайловига олиб чиқмоқчилигини таъкидлади. Трасс хоним хатоларини тан олишини айтиб, узр сўради.
«Жуда оғир даврларни бошдан кечирмоқдамиз. Консерваторлар партияси ҳақида гапириб вақт йўқотиш эмас, аксинча, ишга киришишимиз керак. Бу менинг ҳамкасбларимга мурожаатим. Мен миллий манфаатлар йўлида ҳаракат қилиш учун ўз лавозимимда қоламан» — деди Трасс BBC’га.
Бош вазир одамларга электр тўловлари ва юқори солиқлар муаммосини енгишда ёрдам бермоқчилигини, аммо ҳукумат «жуда узоққа ва жуда тез кетиб қолганини» таъкидлади. У йўл қўйилган хатолар учун узр сўрашини айтди ва ўзининг иқтисодий стратегиясини ўзгартириб, Молия вазирлигига янги раҳбар тайинлаганини эслатди.
Иқтисодий барқарорлик энди устувор аҳамиятга эга, деди Трасс ва мамлакатда «солиқлари паст, ўсиши юқори иқтисодиёт» сақланиб қолаётганини қўшимча қилди.
Сентябрь ойи охирида Трасс ёрдамчиси ва молия вазири Квази Квартенг билан биргаликда солиқларни кескин камайтириш ва бошқа чораларни ўз ичига олган иқтисодий ривожланиш режасини тақдим этганди. Бу Британия бозорлари ва фунт стерлингининг қулашига олиб келди. Шу сабабли, бош вазир молия вазирини ишдан бўшатди ва ўзининг кўплаб режаларидан воз кечди. Консерватив партиянинг бир қатор депутатлари очиқчасига Трасснинг истеъфосини талаб қилди. Daily Mail газетасининг ёзишича, 100 дан ортиқ депутат ишончсизлик вотуми ўтказиш тарафдори. Бош вазир лавозимига номзодлардан бири сифатида баъзи депутатлар мудофаа вазири Бен Уоллесни таклиф қилмоқда.
Изоҳ (0)