Давлат думасига сенатор ва депутатлар учун сафарбарликка чақириш муддатини ортга суришни бекор қилишни кўзда тутувчи қонун лойиҳаси киритилди. Бу ҳақда «Адолатли Россия — Ҳақиқат учун» партияси етакчиси Сергей Миронов маълум қилди, деб ёзади «РИА Новости».
«Федерация кенгаши сенаторлари ва Давлат думаси депутатлари учун сафарбарликка жалб қилиш муддатини кечиктиришни бекор қилишни таклиф этаман», — деб ёзди у Telegram-каналида.
Бундан ташқари, қонун лойиҳасида Росгвардия, ФВВ, ФХХда ҳарбий хизмат ўтаётган ходимларни биринчи ўринда сафарбарликка жалб қилинадиган фуқаролар қаторига қўшиш таклиф қилинмоқда.
Сафарбарлик қачон эълон қилинган эди?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Октябрь ўрталарида эса Путин Россияда қисман сафарбарлик доирасида аллақачон 220 мингдан ортиқ одам ҳарбий хизматга чақирилгани, икки ҳафта ичида тадбирлар якунланиши мумкинлигини маълум қилди.
Изоҳ (0)