Олий Мажлис Сенати раиси, Одам савдосига ва мажбурий меҳнатга қарши курашиш миллий комиссияси раиси Танзила Норбоева 14 октябрь куни «Better Cotton Initiative» (BCI) нодавлат-нотижорат ташкилоти менежери Рейчель Беккет билан учрашди.
Учрашувда Ўзбекистонда мажбурий меҳнатга қарши курашиш борасида амалга оширилган ишлар натижасида ўзбек пахтасига қўйилган бойкот бекор қилингани, бу ундан ишлаб чиқарилган маҳсулотларни жаҳон бозорига чиқиш имкониятини янада кенгайтиргани алоҳида таъкидланди.
Конструктив ва амалий жиҳатларни қамраб олган мулоқот давомида Ўзбекистон ва «Better Cotton Initiative» ўртасида ҳамкорликни кенгайтириш истиқболлари муҳокама қилинди. Хусусан, Ўзбекистон пахта кластерларига халқаро стандартларни жорий этиш, уларни тегишлича лицензиялаштириш ҳамда энг биринчилар қаторида маҳаллий тўқимачилик маҳсулотларида кузатувчанлик тизимини жорий этиш бўйича келишувга эришилди. Бундан ташқари, томонлар BCI’нинг Тошкентдаги ваколатхонасини тез кунларда таъсис этилиши юзасидан келишиб олди.
Маълумот ўрнида, BCI «пахта даласидан сотувгача» бўлган бутун ишлаб чиқариш жараёнини сертификатлаш билан шуғулланади. Ташкилотнинг мингдан ортиқ аъзоси мавжуд бўлиб, улар қаторига H&M, Gap, IKEA, Levi Strauss, Zara, Hugo Boss, Adidas, Puma каби 80 дан зиёд дунёнинг энг йирик брендлари ҳам киради.
Изоҳ (0)