Давлат тест маркази томонидан 3-7 октябрь кунлари 2022/2023-ўқув йили учун профессионал таълим муассасалари (коллеж ва техникумлар)га кириш тест синовлари ўтказилганди. Марказ маълумотига кўра, 15 октябрь куни мазкур тест синовининг якуний танлов натижалари эълон қилинди.
Таъкидланишича, талабгорлар танлов натижаларини my.dtm.uz сайти орқали шахсий кабинетидан билишлари мумкин. Шунингдек, тест синовлари натижасидан норози бўлган абитуриент ёки унинг ота-онаси ёхуд уларнинг ўрнини босувчилар (васийлар) икки кун давомида профессионал таълим муассасасида ташкил этилган апелляция комиссиясига ёзма ёки электрон шаклда апелляция шикоятини бериш ҳуқуқига эга.
Бунда апелляция шикояти қабул қилингани тўғрисида абитуриентга хабарнома берилади. Шикоятни берган абитуриент хабарномада белгиланган кунда ўзининг паспорти (туғилганлик ҳақида гувоҳнома) ва абитуриент рухсатномаси билан келиши шарт.
Шикоятлар икки иш кунида апелляция комиссияси томонидан абитуриентнинг ёзма жавоблари асосида кўриб чиқилади.
Изоҳ (0)