Хавфли касалликларни ўтказиб юбормаслик учун организмдаги ҳар қандай кичик ўргаришларга ҳам эътиборли бўлиш лозим. Акс ҳолда улар жиддий муаммоларга олиб келиши мумкин, деб ёзади «Новий очаг».
Жиддий касалликлар кўпинча аҳамиятсиздек туйилган аломатлар билан бошланади. Бу, албатта, ўз вақтида шифокорга мурожаат қилиш ва касалликни тезда даволаш мумкин бўлган босқичда англаш имкониятини беради. Асосийси, қандай аломатларга эътибор бериш кераклигини билишдир.
Бесабаб вазн камайиши
Парҳез ва қўшимча ҳаракатларсиз вазн йўқотиш кўпчиликнинг яширин орзусидир. Аммо агар бу орзу тўсатдан рўёбга чиқа бошласа, ишни гардеробни янгилашга эмас, балки шифокорга ташриф буюришдан бошлаш лозим: тўсатдан ва бесабаб вазн йўқотиш саратоннинг айрим турларининг белгиси бўлиши мумкин.
Терининг қуриши
Агар тез-тез тери қичишса ва кўча бошласа, эндокринологга мурожаат қилиш тавсия этилади. Терининг тўсатдан қуриши қалқонсимон безнинг нотўғри ишлашини ёки аутоиммун касалликларнинг бошланишини кўрсатиши мумкин.
Тирноқларнинг ранги ёки шаклини ўзгартириш
Тирноқлар организмнинг ҳолати ҳақида кўп нарсаларни айтиб бериши мумкин, шу жумладан касалликларнинг бошланишини ҳам. Агар тирноқларда ўзгариш юз берса, бу бошланғич анемия белгиси бўлиши мумкин; ранг ўзгариши — буйрак муаммолари, тирноқнинг қалинлашиши — юрак ёки ўпка касаллигининг белгисидир.
Томир тортишиши
Агар зинапояга кўтарилиш каби озгина жисмоний фаолиятдан кейин ҳам томирлар тортишиб қолса, шифокорга мурожаат қилиш лозим. Бу оёқ томирларида қон қуйқалари пайдо бўлишининг белгиси бўлиши мумкин. Бундай вазиятда имкон қадар тезроқ чора кўриш яхшироқ.
Терлаш
Ҳаддан ташқари кўп терлашнинг сабаблари бир қанча ва уларнинг аксарияти мутлақо зарарсиздир. Кўпинча, терлашни тўхтатиш учун рационни тўғрилаш ва спиртли ичимликлардан воз кечиш кифоя. Аммо баъзида сабаб эндокрин тизимнинг нотўғри ишлаши, қалқонсимон без касалликлари ва ҳатто артериянинг тиқилиб қолиши билан боғлиқ бўлиши мумкин.
Жиғилдон қайнаши
Жиғилдон қайнаши тез-тез кузатилса ва узоқ вақт тарк этмаса, албатта, шифокор кўригидан ўтиш керак: жиғилдон қайнаши саратоннинг айрим турларининг аломати бўлиши мумкин. Бундан ташқари, жиғилдон қайнаши инфаркт белгиларидан биридир.
Доимий чарчоқ ҳисси
Кўп ишлаб, кам дам олиш саломатлик учун яхши эмас. Аммо озгина ишлашдан кейин ҳам чарчоқни ҳис қилиш — бу шифокорга мурожаат қилиш учун жиддий сабабдир. Чунки бу бошланган саратон ёки склерознинг белгиси бўлиши мумкин.
Қабзият
Ичак ҳаракати билан мунтазам муаммолар нотўғри овқатланиш ёки организмдаги суюқлик етишмаслигидан келиб чиқиши мумкин. Бу метаболик касаллик ва қандли диабет билан ҳам боғлиқдир. Шифокорга мурожаат қилиб, қонда шакарни текшириб кўриш лозим.
Бош айланиши
Агар стул ёки дивандан турганда доимо бош айланса, организмдаги темир даражасини текшириб кўриш лозим. Бу бошланғич анемиянинг аломати бўлиши мумкин, касалликни даволаш жуда осон, аммо уни эътиборсиз қолдирмаслик керак.
Изоҳ (0)