Эстония ҳукумати асосий мактаблар ва гимназиялар тўғрисидаги қонунга ўзгартиришлар киритишни ҳамда 2030 йилгача таълимни эстон тилига ўтказиш бўйича чора-тадбирлар режасини тасдиқлади. Бу ҳақда Вазирлар Маҳкамаси матбуот хизматига таяниб, «Интерфакс» хабар берди.
Тасдиқланган қонун лойиҳаси таълим тилини эстон тилига ўтказиш учун асос ва шарт-шароитлар яратишни назарда тутади.
Ўтиш мактабгача таълим муассасаларида 2024/2025-ўқув йилида, бошланғич мактабларнинг 1 ва 4-синфларида эса 2030 йилда якунланиши кутилмоқда. 2029/2030-ўқув йилигача эстон тилида ўқитиш улуши ўқув режасининг камида 60 фоизини, бошқа тилнинг улуши 40 фоизгача бўлиши керак.
Қонун лойиҳаси муайян мақсадли гуруҳлар учун, масалан, ўзлаштиришда қийналадиган ўқувчилар ёки алоҳида эҳтиёжли талабалар учун таълимда эстон тилидан ташқари ёки эстон тили ўрнига бошқа тилдан фойдаланиш имконини беради.
Эстония ҳукумати эстон тилида ўқитишга ўтиш бўйича батафсил режани тасдиқлади, унда 2030 йилгача кўриладиган зарур тадбирлар, муддатлар ва манбалар кўрсатилган. Хусусан, режада мактабларни малакали ўқитувчи ва етакчилар билан таъминлаш, уларнинг рағбатлантирилишини ошириш чора-тадбирлари назарда тутилган.
2023 йил сентябрдан бошлаб республиканинг асосан русийзабонлар яшайдиган шимоли-шарқидаги эстон тилида дарс берадиган барча ўқитувчилар учун асосий иш ҳақининг 1 ярим, бошланғич синф ўқитувчилари учун эса 1,3 ставкаси жорий этилади. Ушбу ҳудудга кўчиб ўтишга тайёр бўлган ўқитувчилар учун имтиёзлар кўзда тутилган: қўшимча нафақа, субсидияли уй-жой ва бошқа чора-тадбирлар.
Бундан ташқари, мутасаддилар жорий йилдан бошлаб бошланғич, умумий ва касб-ҳунар таълими босқичларида тил ўргатиш ва таълим тили устидан назоратни кенгайтиришга қарор қилди.
Изоҳ (0)