Тошкент халқаро аэропортида 57 дона тимсоҳ болалари ҳамда 10 дона буқаламунларни ноқонуний равишда олиб киришга бўлган уринишларни фош қилиниб, улар вақтинча сақлаш учун ҳайвонот боғига топширилганди. Давлат божхона қўмитаси уларнинг бир қисми нобуд бўлганини маълум қилди.
Қўмита матбуот хизматининг билдиришича, ушлаб қолинган тимсоҳ болалари бегона қўлларга чиқиб кетганлиги юзасидан ижтимоий тармоқларда шубҳа-гумонлар юзага келгани туфайли Тошкент ҳайвонот боғида бўлиб, жониворларнинг ҳозирги ҳолати билан қизиқди.
Маълум бўлишича, тимсоҳчалар ҳайвонот боғи экспозициясида ташриф буюрувчилар эътиборига ҳавола қилинмоқда. Ёввойи табиатдан ажратиб олинганлиги сабабли тимсоҳ болаларининг барчаси ҳам бирдек хонаки шароитга мослашганича йўқ. Уларнинг айримлари мустақил равишда озиқлана олмаяпти.
Шунингдек, ҳамон махсус карантинда сақланаётган буқаламунларнинг аҳволини ҳам яхши деб бўлмайди. Улар қутида мевалар орасида олиб келинганлиги сабабли парвоз вақтида мевалар ичида сиқилиб қолиб, жиддий шикаст еган.
Натижада, ҳозирга келиб 1 бош тимсоҳча ва 6 бош буқаламун нобуд бўлган. Ҳозирда улар утилизацияга қадар махсус музлаткичда сақланмоқда.
Ўзбекистон фаунасида Нил тимсоҳлари ва Яман буқаламунлари учрамаслиги сабабли улар мамлакат Қизил китобида учрамайди. Аммо, Халқаро қизил китобга киритилгани сабабли ҳам йўқ бўлиб кетиш хавфи остидаги ёввойи фауна ва флора турлари билан Халқаро савдо қилиш конвенциясига мувофиқ ушбу жонзотларни республикага олиб киришда CITES махсус рухсатномаси талаб этилади. Ўзбекистон Экология ва атроф-муҳитни муҳофаза қилиш давлат қўмитасидан олинган маълумотларга кўра, бундай рухсатнома олиш учун мурожаат келиб тушмаган.
Жониворларнинг кейинги тақдири суд ҳукмига биноан ҳал бўлади. Ҳолат юзасидан божхона органлари томонидан Жиноят кодексининг бир нечта моддалари билан жиноят иши қўзғатилган.
Изоҳ (0)