Бухоро ва Тошкент вилоятларида 2030 йилгача чиқиндилар ҳосил бўлишини 2 бараварга қисқартириш режалаштирилган. Бу ҳақда Сенат раиси Танзила Норбоева парламент комиссияси йиғилишида маълум қилди, дея хабар бермоқда «Дарё» мухбири.
Танзила Норбоеванинг таъкидлашича, ҳозирда Бухоро ва Тошкент вилоятларида бор-йўғи 10-15 фоиз чиқинди қайта ишланади.
Чиқиндилар ҳосил бўлишининг олдини олиш, қайта ишлаш ва такрорий фойдаланиш бўйича чораларни қабул қилиш орқали уларнинг ҳажмини 2030 йилгача икки бараварга қисқартириш юзасидан Бухоро ва Тошкент вилоятларида олиб борилаётган ишларни ўрганиш шуни кўрсатдики, амалга оширилган ижобий ишлар билан бирга, соҳада мавжуд кўплаб муаммо ва камчиликлар сақланиб қолмоқда.Шунингдек, мажлисда қайта ишланмайдиган чиқиндилар – биологик чиқиндилар, канализация ва маиший оқава сувлар билан боғлиқ муаммолар, маиший оқава сувлардан таралаётган ёқимсиз ҳид туфайли аҳоли вакиллари томонидан асосли эътирозлар бўлаётгани айтилди. Бу муаммоларни ҳал қилиш бўйича таклифлар билдирилди.Хусусан, «Чиқиндилар тўғрисида»ги қонуннинг 11-моддасида маҳаллий давлат ҳокимияти органларига чиқинди билан боғлиқ ишларни амалга оширишга оид маҳаллий дастурларни тасдиқлаш ваколати берилган бўлса-да, Бухоро ва Тошкент вилоятида бундай дастурлар ишлаб чиқилмаган ва тасдиқланмаган. Иккиламчи хом ашёни қабул қилиш шохобчалари Бухоро вилоятида 20 та, Тошкент вилоятида эса 21 та ноқонуний фаолият юритмоқда. Шу билан бирга, хизмат учун замонавий тўлов тизим амалиётга жорий этилмагани боис Бухоро вилоятида 25,8 миллиард сўм, Тошкент вилоятида 44 миллиард сўм аҳолининг дебитор қарздорлиги юзага келган.
Ўрганишлар натижасида аниқланишича, чиқиндиларни йиғиш, саралаш, қайта ишлаш ва утилизация қилиш аҳволи қониқарли ҳолатда эмас. Деярли барча вилоятлар, жумладан, Бухоро ва Тошкент вилоятларида ҳам чиқиндиларнинг бор-йўғи 10-15 фоизи қайта ишланмоқда, – деди Сенат раиси.
Изоҳ (0)