Қозоғистон Марказий сайлов комиссияси президентликка номзодлар Хайрулла Габжалилов, Талгат Ергалиев ва Фатима Бизакова қонунчиликда белгиланган талабларга мувофиқ келмаслигини маълум қилди, деб ёзади Tengrinews.
МСК раиси Нурлан Абдиров маълум қилишича, ушбу номзодлар Конституция ва «Қозоғистон Республикасидаги сайловлар тўғрисида»ги конституциявий қонунда кўзда тутилган талабларга жавоб бермайди.
Талгат Ергалиев «Қозоғистон қурувчилару иттифоқи» республика юридик шахслар бирлашмаси томонидан президентликка илгари сурилганди. У давлат лавозимида 3 йил-у 4 ой ишлаган, қонун бўйича эса стаж 5 йилдан кам бўлмаслиги керак. Бунинг устига, «Қурувчилар иттифоқи» юридик шахслар бирлашмаси бўлиб, фақат республика жамоатчилик бирлашмасигина ўз номзодини илгари суриш ҳуқуқига эга.
Хайрулла Габжалилов «Асар» оралманлар бирлашмаси» вакили бўлиб, у Қорақалпоғистонда туғилгани учун номзодликка тўғри келмайди: президентликка номзод Қозоғистон фуқароси бўлиб туғилган бўлиши керак.
«Амалий психология» республика жамоатчилик бирлашмасидан номзод қилиб кўрсатилган Фатима Бизакова эса давлат хизматида ёки сайлаб қўйиладиган лавозимда иш тажрибасига эга эмас, бу президентликка номзодларга қўйилган талабга зиддир.
Эслатиб ўтамиз, 11 октябрь куни Қозоғистон Марказий сайлов комиссияси республика президенти лавозими учун курашиш ниятида бўлганлардан аризалар қабул қилишни якунлади. «Марказий сайлов комиссиясига республика жамоатчилик бирлашмалари томонидан илгари сурилган 12 нафар номзоддан ҳужжатлар тақдим этилди», — деди МСК котиби Мухтар Ерман 12 октябрь кунги мажлисда.
Шундан кейин кўп ўтмай, Қосим-Жўмарт Тўқаев Қозоғистон президенти лавозимига навбатдан ташқари сайловларда қатнашиш учун номзод сифатида рўйхатга олингани хабар берилди.
Сайлов қачон бўлади?
Қозоғистонда 20 ноябрь куни навбатдан ташқари президентлик сайлови ўтказилади. Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказиш таклифини 1 сентябрь куни халққа йўллаган мурожаатида билдирганди. Президентлик мандатини етти йиллик битта муддат билан чеклашни ва қайта сайланишни тақиқлашни ҳам ўша мурожаатида таклиф қилганди.20 ноябрь куни овоз бериш маҳаллий вақт билан 07:00 дан 20:00 гача бўлиб ўтади. Маъмурий-ҳудудий бирликлар бўйича овозларни ҳисоблаш натижалари ҳудудий сайлов комиссиялари томонидан амалга оширилади ва икки кун муддатда, яъни 22 ноябрга қадар Марказий сайлов комиссиясига етказилади.
21 октябрь куни 18:00 да сайловолди ташвиқоти бошланиб, 19 ноябрь 00:00 га қадар давом этади. 19 ноябрь — жимжитлик куни.
Изоҳ (0)