АҚШ президенти Жо Байден Индонезиядаги G20 саммитида Россия президенти Владимир Путин билан учрашишни режалаштирмаяпти — ҳатто наркотиклар контрабандасида айбланаётган баскетболчи Бриттни Грайнерни айирбошлаш масаласи бўйича ҳам. Бу ҳақда Оқ уй матбуот котиби Карин Жан-Пьер маълум қилди, деб ёзади «РБК».
«Унинг Владимир Путин билан учрашиш нияти йўқ», — деди у.
Жан-Пьер қайд этишича, Байден Россия томони АҚШ томонидан берилган, маҳбусларни айирбошлаш ҳақидаги таклифни қабул қилиши кераклигига ишончи комил, акс ҳолда, Россиянинг ўзи музокаралар ҳақидаги жавоб таклифи билан чиқишига тўғри келади.
G20 саммити 15—16 ноябрь кунлари Индонезияда ўтказилиши керак. Индонезия ташқи ишлар вазири Ретно Марсуди Россия ва Украина президентлари саммитда қатнашишини маълум қилди. Аввалроқ АҚШ президенти Жо Байден G20 етакчиларининг навбатдаги йиғилишида Россия президенти Владимир Путин билан учрашишни истисно қилмаган эди. Россия ташқи ишлар вазири Сергей Лавров эса агар АҚШ томонидан таклиф киритилса, Кремль G20 саммитида Россия ва Америка президентларининг учрашиш имкониятини кўриб чиқишга тайёрлигини билдирди. Кейинроқ Байден Индонезиядаги G20 саммитида Россия етакчиси Владимир Путин билан учрашишдан маъно йўқлигини айтди. Байденнинг сўзларига кўра, учрашув ҳақидаги қарор Путин нима ҳақида гаплашмоқчи эканлигига боғлиқ бўлади. Масалан, агар Путин наркотиклар контрабандасида айбланаётган баскетболчи Бритни Гринерни айирбошлашни муҳокама қилмоқчи бўлса, у суҳбатга рози бўлади. Украина президенти Владимир Зеленский G7 мамлакатлари етакчиларининг онлайн учрашувида кескин нутқ сўзлаб, G7 давлатлари раҳбарларини Россиянинг амалдаги раҳбари билан ҳеч қандай мулоқот бўлиши мумкин эмаслиги борасидаги аниқ ҳақиқатни тан олишга чақирди, чунки Россия раҳбарининг ўзи Украинанинг йиллар давомида тинчлик музокараларини ўтказишга уринишларига қарамай, мулоқотни рад этган. G20 саммити (энг ривожланган ва ривожланаётган иқтисодиётига эга мамлакатлар, жумладан, Европа Иттифоқи давлатлари, АҚШ, Россия, Хитой, Буюк Британия, Бразилия, Саудия Арабистони ва бошқаларни бирлаштиради) 15—16 ноябрь кунлари Балида бўлиб ўтади. Индонезия апрель ойида G20 етакчиларига таклиф юборган. Украина ассоциацияга аъзо бўлмаса-да, тадбирга президент Владимир Зеленский ҳам таклиф этилган. Маълумот учун, аввалроқ АҚШ Россияга жосуслик ҳақидаги модда бўйича Россияда судланган Пол Уилан ва наркотиклар контрабандаси бўйича судланган баскетболчи Бриттни Грайнерни АҚШда ноқонуний қурол етказиб бериш айблови бўйича 25 йилга ҳукм қилинган Виктор Бутга айирбошлашни таклиф қилган. Россия ТИВ Москва ва Вашингтон ўзларининг ҳибсдаги фуқароларини айирбошлаш бўйича музокаралар олиб бораётгани, бироқ ҳозирча аниқ бир натижалар йўқлигини қайд этганди.
Изоҳ (0)