Шимолий Корея етакчиси Ким Чен Ин узоқ масофали қанотли ракеталарни синовдан ўтказишга шахсан бошчилик қилди. Бу ҳақда Reuters хабар берди.
Шимолий Корея раҳбари мамлакат «ядровий стратегик қуролли кучлари кўламини кенгайтиришда давом этиши» кераклигини таъкидлади. Унинг тушунтиришича, бу ҳар қандай муҳим ҳарбий инқирозни исталган вақтда ушлаб туришга тайёр туриш учун зарур. Бундан ташқари, Ким Чен Иннинг фикрича, КХДР бу масалада тўлиқ етакчиликни ўз зиммасига олмоқда.
Маълум қилинишича, Шимолий Кореянинг иккита ракетаси 2000 километр масофадаги нишонга аниқ зарба берган. Уларнинг ишга туширилиши қуролларнинг жанговар самарадорлиги ва кучини янада оширишга, хусусан, «оператив фойдаланишнинг бутун тизими ишончли ва техник хавфсиз эканини» тасдиқлашга қаратилган эди.
Аввалроқ Ким Чен Ин тактик ядро бўлинмаларининг ҳарбий тайёргарлигини кўздан кечирган эди. Хабарларга кўра, Ким Чен Ин АҚШ ва Жанубий Корея билан музокаралар олиб боришдан манфаатдор эмаслигини очиқ айтган.
«Бизда душманлар билан мулоқот қилиш учун асос йўқ, бунга эҳтиёж ҳам сезмаяпмиз», — дея унинг сўзларини келтиради ОАВ.
Корея ярим оролидаги кескинлик охирги пайтларда кучайди. Пхеньян сентябрь ойи охиридан бери Жанубий Корея ва АҚШнинг ҳарбий машғулотларига жавобан мунтазам равишда баллистик ракета учирмоқда. Шунингдек, Шимолий Корея яқин келажакда ядровий синов ўтказиши мумкинлигидан хавотирлар кучаймоқда.
Изоҳ (0)