Қирғизистон жамоатчилиги Тожикистон билан яқинда бўлиб ўтган зиддият туфайли, Коллектив хавфсизлик шартномаси ташкилоти (КХШТ)нинг «Мустаҳкам биродарлик-2022» машғулотларида армиянинг иштирокини маъқулламаган бўларди, шунинг учун ўқув машқларини бекор қилишга тўғри келган. Бу ҳақда Қирғизистон Вазирлар маҳкамаси раиси ўринбосари Эдил Байсалов «РИА Новости»га маълум қилди.
Унинг сўзларига кўра, «КХШТга аъзолик мутлақо бузилмасдир»:
«Бизда ушбу ташкилотга нисбатан ҳеч қандай муаммолар йўқ, мандат билан ҳам, миссия билан ҳам, устав билан ҳам — ҳеч қанақа. Лекин, албатта, сўнгги вақтларда юз берган воқеалар фонида ҳали қонимиз совимади», — деди Байсалов гап «тожик қўшнилар» билан ҳарбий тўқнашувлар ҳақида бораётганига аниқлик киритиб.
«Уларсиз (Тожикистонсиз) эса бўлмайди, ‘сизлар келманглар, қозоқлар, руслар, беларуслар эса, сизлар келинглар’ деб бўлмайди. Бунақа бўлиши мумкин эмас, шу сабабли иштирокимизни бекор қилишга тўғри келди, ва КХШТнинг барча пойтахтларида бизни мутлақо тушунишди. Шунга қарамай, биз бу нотўғри талқин қилинишидан хавотирдамиз, бу борадаги тахминлар эса бутунлай масъулиятсизликдир», — дея хулоса қилди у.
Аввалроқ Бишкек Коллектив хавфсизлик шартномаси ташкилоти (КХШТ) ҳарбий машғулотларида қатнашишдан бош тортгани ҳақидаги хабарлар фонида Россия Ташқи ишлар вазирлигига Қирғизистон элчиси Гулнара-Клара Самат чақирилгани хабар берилди.
Қирғизистон КХШТ машғулотларини бекор қилди
Эслатиб ўтамиз, Қирғизистон Мудофаа вазирлиги КХШТ тинчликпарвар кучлари билан «Мустаҳкам биродарлик – 2022» қўмондонлик-штаб ўқув машғулотларини бекор қилди. Ўқув машғулотлари 10—14 октябрь кунлари Иссиқкўл вилоятининг Балиқчи шаҳрида бўлиб ўтиши керак эди. Уларни кузатиш учун Ўзбекистон, Сербия, Сурия, Туркманистон ва Мўғулистондан вакиллар таклиф қилинганди. Машғулотлар доирасида ўт очишни тўхтатиш режимини таъминлаш масалаларини ишлаб чиқиш режалаштирилган эди.Экспертлар бунга яқинда Тожикистон билан чегарада юз берган қуролли низони сабаб қилиб келтирмоқда, шу сабабли Бишкек ўз ҳудудида тожикистонлик ҳарбийларни қабул қилишни ва улар билан ҳамкорликда машғулотлар ўтказишни истамаяпти, деди улар. Айни вақтда, воқеа Бишкек ва Москва ўртасидаги алоқаларга таъсир қилиши амри маҳоллиги айтилмоқда. Бироқ Қирғизистон президенти Садир Жапаров 7 октябрь куни россиялик ҳамкасби Владимир Путиннинг юбилейига келмагани эътибордан четда қолмаган.
Чегарадаги зиддият
Тожикистон ва Қирғизистон чегарасидаги катта кўламли жанговар тўқнашувлар 14—17 сентябрь кунлари содир бўлди. Томонлар ҳалигача бир-бирини отишмаларда айбламоқда.Қирғизистон тўқнашувлар натижасида 62 нафар фуқароси ҳалок бўлиб, 198 нафари жабрланганини маълум қилди. Тожикистон эса расман 41 нафар қурбон ва 30 нафар ярадор ҳақида баёнот берди.
25 сентябрь куни икки мамлакат вакиллари вазиятни тартибга солиш ҳақида баённома имзолаб, чегарадаги низони тўхтатишга ҳамда уни делимитация ва демаркация қилиш жараёнини тезлаштиришга келишиб олди.
Изоҳ (0)