O‘zbekistonning birinchi borti Ostonaga borib qo‘ndi. Shavkat Mirziyoyevni Qozog‘iston bosh vaziri Alixan Smailov kutib oldi.
Mamlakat yetakchisi Osiyoda hamkorlik va ishonch choralari bo‘yicha kengash hamda Mustaqil Davlatlar Hamdo‘stligi davlat rahbarlari kengashi sammitlarida nutq so‘zlashi kutilmoqda.
Shuningdek, hamkor mamlakatlar delegatsiyalari rahbarlari bilan ikki va ko‘p tomonlama uchrashuv hamda muzokaralar o‘tkazadi.
Avvalroq Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 12-oktabr kuni Ostona shahriga jo‘nab ketgani haqida xabar berilgandi.
Prezident u yerda Osiyoda hamkorlik va ishonch choralari bo‘yicha kengash hamda Mustaqil Davlatlar Hamdo‘stligi davlat rahbarlari kengashining navbatdagi majlislarida ishtirok etadi. Ushbu sammitlar doirasida hamkor mamlakatlar delegatsiyalari rahbarlari bilan ikki tomonlama uchrashuvlar o‘tkazish ham rejalashtirilgan.
Ta’kidlanishicha, Osiyoda hamkorlik va ishonch choralari bo‘yicha kengash sammiti — mintaqa mamlakatlari o‘rtasida “muloqot forumi” sifatida tanilgan. Uning asosiy maqsadi Osiyoda tinchlik, xavfsizlik va barqarorlikni ta’minlash bo‘yicha hamkorlikni kengaytirish, giyohvandlik vositalarining noqonuniy ishlab chiqarilishi va aylanishiga qarshi kurashish, savdo-iqtisodiy hamkorlikni kengaytirishdan iborat.
Kimlar qatnashmoqda?
Bu sammit Osiyo mintaqasining deyarli barcha davlat yoki hukumat rahbarlari ishtirok etayotgani inobatga olinsa, xalqaro hamkorlikni kengaytirish bo‘yicha noyob muloqot maydoni hisoblanadi. Bugunga qadar 51 ta delegatsiya rahbarlari sammitda ishtirok etishini tasdiqlagan. Ularning 12 nafari davlat rahbarlaridir.
Xususan, O‘zbekiston, Turkiya, Ozarbayjon, Rossiya, Iroq, Eron, Qatar, Falastin kabi mamlakatlar prezidentlari sammitda qatnashadi. Markaziy Osiyo mintaqasidan esa faqatgina Afg‘oniston ishtirok etmayapti.
Sammitning asosiy prinsiplari
Suveren tenglik va suveren huquqlarni hurmat qilish, nizolarni tinch yo‘l bilan hal qilish, iqtisodiy, ijtimoiy va madaniy hamkorlik, davlatlarning ichki ishlariga aralashmaslik, kuch ishlatmaslik yoki kuch ishlatish bilan tahdid qilmaslik, davlatlarning hududiy yaxlitligi, qurolsizlanish va qurollarni nazorat qilish, inson huquqlari va asosiy erkinliklarini hurmat qilishdan iborat.
Osiyoda hamkorlik va ishonch choralari bo‘yicha kengashiga qaysi mamlakatlar a’zo?
Kengashning doimiy a’zolari: O‘zbekiston, Ozarbayjon, Afg‘oniston, Bahrayn, Bangladesh, Vyetnam, Misr, Isroil, Hindiston, Iordaniya, Iroq, Eron, Qozog‘iston, Qatar, Kambodja, Xitoy, Janubiy Koreya, Qirg‘iziston, Mo‘g‘uliston, BAA, Pokiston, Falastin, Rossiya, Tojikiston, Tailand, Turkiya, Shri-Lanka.
Kengashda kuzatuvchi maqomidagi mamlakatlar: Belarus, Indoneziya, Malayziya, AQSH, Ukraina, Filippin, Yaponiya, Laos va Turkmaniston.
Izoh (0)