Актёр Маъруф Отажонов турк сериалидан ҳафтасига қанча гонорар олишини маълум қилди

Актёр ва режиссёр Маъруф Отажонов турк кино юлдузи Бурак Ўзчивит билан биргаликда «Қурилиш: Усмон» деб номланган тарихий сериалда мўғул императори Гейҳату ролини ижро этмоқда.

Актёр Маъруф Отажонов «Дарё» мухбири Феруз Муҳаммадга берган қисқа интервьюсида ушбу роли учун турк киноижодкорларидан қанча гонорар олаётганига ойдинлик киритди.

Ўзбек актёрларининг даражаси анча баланд. Мактаб жиҳатидан олиб қарайдиган бўлсак ҳам бизнинг актёрлар кўплардан анча устун туради. Лекин бизни ўзимизнинг одамларимиз, ўзимизнинг бошлиқларимиз, ўзимиз аслида туришимиз керак бўлган даражага олиб чиқмаяпти. Бизга негадир ишонқирамай қарашмоқда. Актёрларимиз эса маҳорат жиҳатидан жуда ҳам кучли ҳисобланади.

Мен мақтанмай гапираман. Агар ёмон актёр бўлганимда, Туркияда суратга олинаётган «Қурилиш: Усмон» сериалининг учта қисмидан сўнг ҳайдаб юборишарди. Раҳмат Маъруф аби, дерди, бўлди. Чунки сериал суратга олиш бошланганида сериалнинг учта қисмига таклиф қилинганман холос. Мана ушбу сериалда учинчи йил, тўртинчи мавсумгача рол ижро қилиб келмоқдаман. Айтмоқчи бўлганим, бизни актёрларимизга дунё тан бермоқда. Масалан Голливуд актёри Арманд Ассанте ўзбек режиссёри Баҳодир Йўлдошевга, Абдулатиф тарихий образини гавдалантирган Жавоҳир Зокировга тан берди. Менинг юзимга қараб, «сен шунча дардни қаердан оляпсан», деб сўраганди, «мен ҳеч қаердан олмаяпман, бизнинг ўзбек мактабимиз шундай тарбиялаган», деб жавоб берган эдим.

Бу маълумотни ҳеч қаерда яширмайман. Бизда гонорар миқдори жуда кам. Мисол учун, мени ўзбек киносига съёмкага чақиришса, бир ой ичида бир миллион сўм, узоғи билан бир ярим миллион сўм, агар жуда бир ҳурмат қилишса, икки миллион сўм пул беришади.

Туркиядаги тарихий сериалдан эса бир ҳафта ичида йигирма миллион, ўттиз миллион сўм гонорар оламан. Буни яширмайман. Бу бизнинг актёрларимизга бўлган ҳурматдан деб ўйлайман.

Турк ижодкорларини гонорар бериш борасида яна бир зўр жиҳати бор. Сиз дейлик улар билан бир ҳафтага 30 миллион сўмга шартнома тузгансиз, лекин съёмка тугаганида яна беш миллион сўм қўшимча мукофот пули ҳам беришади. Йўл ва Туркияда яшаш харажатларини ўзлари қоплаб беришади.

Яқинда съёмкадан қайтаётганимда гонораримдан ташқари, олишим керак бўлган пулнинг ярми миқдорида пул бериб, «Маъруф аби, сен сабаб биз янада яхши муваффақиятга эришяпмиз», дейишди. «Бу нарсани албатта ўзбек киносидагиларга бориб етказаман», дедим. Бу гапни кўпчиликка айтяпман. Гапим кимгадир ёқяпти, кимгадир ёқмаяпти.

Маъруф Отажонов, актёр, каскадёр, режиссёр