Bugun,

  • USD 11095.31
  • RUB 173.84
  • EUR 10772.44

Aktyor Ma’ruf Otajonov turk kino yulduzi Burak O‘zchivit bilan birgalikda “Qurilish: Usmon” deb nomlangan tarixiy serialda mo‘g‘ul imperatori Geyhatu rolini ijro etmoqda.

Foto: Instagram / @atvturkiye

Foto: Instagram / @atvturkiye

Foto: Instagram / @atvturkiye

Foto: Instagram / @atvturkiye

Foto: Instagram / @atvturkiye

Foto: Instagram / @atvturkiye

Ma’ruf Otajonov “Daryo” muxbiri Feruz Muhammadga bergan intervyusida ushbu rolga hech qanday kastinglarsiz tanlab olingani haqida gapirib berdi.

Turkiyada mening Farhod Badalov degan bir shogirdim bor edi. Bir kuni telefon qilib qoldi, meni Amir Temur rolida o‘ynaganimni rejissorga aytganligini va suratimni yuborishimni so‘radi. Surat yubordim, keyin “

Ertagayoq samolyotda uchib kelishingiz shart ekan” dedi. “To‘xta-to‘xta, nima gap o‘zi?” dedim. “Bu yerda turklar ‘Qurilish: Usmon’ nomli serial suratga olyapti. 28 ta davlat bilan shartnoma tuzilgan. Sizni gap-so‘zsiz qabul qilishdi. Hech qanaqa kastingdan o‘tmaysiz. Rolingiz juda ham zo‘r, lekin 3 kunlik syomkangiz bor” deb aytdi.

Shu shogirdim Farhodning gapi bilan Turkiyaga bordim. Turkiyada o‘zimizning aktyorlarni ham ko‘rdim. “Mendirman Jaloliddin” seriali ijodkorlari, do‘stlarimiz kutib olishdi. Do‘stlarim Boir Xolmirzayev, Tohir Saidov xursand bo‘lib, “Siz shunaqa serialga olinibsiz”, deb tabriklashdi.

O‘zim esa ikkilanib turgandim. Dinimiz bir bo‘lishi mumkin, lekin tilda muammo bo‘lishi mumkin deb o‘yladim. 10 kuncha tayyorlanib olaman deb ham rejalab olgan edim. Lekin 10 kun emas, 3 kundan keyin syomkaga chaqirishdi.

Matnni berishdi, qo‘limga matnni olganimda meni qo‘rquv bosdi. Buni eplay olmasligimni bildim. Bu mo‘g‘ul imperatori obrazi ekan, juda katta shov-shuvga ega rol ekan. Bitta narsa menga dalda bo‘ldi: “Men o‘zbekman, o‘zbekistonlikman. Men O‘zbekistonning aktyoriman, shu yerda tarbiya topdim. Menda g‘urur degan narsa bor”, deb o‘zimga o‘zim tinmasdan qaytarib turdim. Bu narsani ichki monolog deyishadi. Qaysi millatdan bo‘lishidan qat’i nazar, meni hurmat qilib chaqirdimi, men hech qachon millatimni pastga urmayman.

Til bilmayman desam, ketishim ham mumkin edi, lekin o‘ynayman, dedim. Men o‘zbek aktyorining qanaqa kuchga ega ekanligini qo‘limdan kelguncha ko‘rsatishni o‘zimga maqsad qildim.

Xullas, bordim. 200 dan ortiq odamdan tashkil topgan jamoa. Hammasi turklar. Ularning ko‘zidan bilinib turibdi, menga juda katta ishonch bildirishgan. Kelib birma-bir tanishishyapti. Men falonchiman deb ismini aytyapti,  “Men Ma’rufman” deyman. “O Ma’ruf abi, Ma’ruf abi”, deyishdi. Meni yaxshi qabul qilishdi.

Syomkamni tugatdim, ertasiga telefonlarda Turkiyaning bir kanalida reklama ketyapti. Men ham paydo bo‘lyapman. Hayron qolyapman, tavba, kechagina o‘ynagan narsam. Yana to‘g‘ridan to‘g‘ri turk tilida gapiryapman.

30-qismda o‘ynagan rolim uncha katta  emasdi. Lekin hajm tomondan katta edi. Keyin rejissor navbatdagisiga chaqirib,  “Ma’ruf abi, ko‘rdingmi? Xursandmisan?” dedi. “Xursandman, xursandman” dedim. “Biz undan-da xursandmiz” dedi.

Meni taklif qilgan Farhod Badalov oldida uni uyaltirib qo‘ymaganimdan xursand bo‘ldim. Chunki ularning oldida Farhod katta hurmatga ega ekan. U bizning u yerdagi boshlig‘imiz hisoblanadi. Menda Farhod uyalmasin, degan narsa turibdi. “Ustozimni chaqirdim, sharmanda qilib qo‘ymasin” degan o‘y bilan yurgan bo‘lsa-chi, degan narsa doim xayolimdan o‘tib turardi. Allohga behisob shukr, bu narsa bo‘lmadi. Ularda o‘zimga nisbatan ko‘proq qiziqish uyg‘otdim.

Ma’ruf Otajonov, aktyor, rejissor

Ayni kunlarda “Qurilish: Usmon” tarixiy seriali namoyish etilayotgan ATV turk telekanalining Instagram sahifasida aktyor Ma’ruf Otajonov ijrosidagi mo‘g‘ul imperatori rolini e’tirof etgan.

Ma’lumot uchun, aktyor Ma’ruf Otajonov “Mirzo Ulug‘bek. Osmon toqiga qo‘yilgan narvon” hujjatli filmida Amir Temur rolini ijro etgan. Bundan tashqari, u rus kinematograflari tomonidan suratga olingan bir qancha seriallarda turli darajadagi rollarni ham ijro etgan.

Izoh
Asosiy yangiliklar
Mahalliy
“Odamlar o‘limida o‘zimni aybdor hisoblamayman” — Nukusdagi tartibsizliklar yetakchisi Dauletmurat Tajimuratov
Madaniyat
“Xudodan qo‘rqmagan odamdan qo‘rqdim”. O‘zbekiston xalq artisti Bobomurod Hamdamov oilaviy nizolar tufayli ijara uyda yashamoqda (video)
Sport
O‘zbekiston amputantlar terma jamoasi futbolchilariga Cobalt avtomobillari topshirildi