«НАТО келаси ҳафта ядровий ҳужумни тўхтатиш бўйича машқлар ўтказади» — Столтенберг

НАТО бош котиби Йенс Столтенберг Россиянинг Украинага қарши урушдаги ғалабаси альянснинг мағлубияти бўлишини айтди, деб ёзади Meduza.

«Россиянинг урушдаги ғалабаси НАТОнинг мағлубияти бўлади, бунга йўл қўйиб бўлмайди. Кеча биз кўрган нарса (Украинага ракета зарбалари) Россия кучсизлигидан далолат беради, чунки Россия жанг майдонида олдинга силжимаяпти», — дейди Столтенберг.

У, шунингдек, Россия Украинада ядро қуролидан фойдаланмаслигига ишонч билдирди. Шунга қарамай, у альянс аъзолари ҳушёр туришини ва келаси ҳафта блок мамлакатлари ядровий тўсиқ бўйича машғулотлар ўтказишини таъкидлади.

Аввалроқ НАТО Ҳарбий-ҳаво кучлари Литва армияси билан биргаликда Калининград вилояти яқинидаги Curonian Spit ҳудудида ҳарбий машғулотлар ўтказган эди. Маневрлар давомида мутахассислар ҳаводан ўқ узишни мувофиқлаштириш бўйича қўшма ҳаракатларни ишлаб чиққан эди.