Qozog‘istonning Ukrainadagi elchixonasi Ukraina hududida bo‘lib turgan qozog‘istonliklarga murojaat qilib, ulardan iloji bo‘lsa mamlakatni tark etishni so‘radi.
Ukraina bo‘ylab fuqarolik infratuzilmasi va davlat obyektlariga hujumlar kuchaygani munosabati bilan Qozog‘iston respublikasi elchixonasi o‘z fuqarolarini Ukrainaga borishdan tiyilishga, mamlakatda bo‘lganlarni esa havo hujumi trevogasini e’tiborsiz qoldirmaslikka hamda boshpana va bombapanohlarda qolishga chaqiradi. Shuningdek, elchixona Qozog‘iston fuqarolaridan iloji bo‘lsa, Ukraina hududini tark etishni so‘raydi, — deyiladi murojaatda.11-oktabr kuni O‘zbekistonning Ukrainadagi elchixonasi ham Ukraina shaharlariga raketa hujumlarining kuchayishi ortidan O‘zbekiston fuqarolarini ushbu mamlakatni tark etishga chaqirdi. Elchixona, shuningdek, ziddiyat o‘z iziga tushguniga qadar Ukrainaga sayohat qilmaslikni so‘ragan.
Eslatib o‘tamiz, 10-oktabr kuni ertalab Rossiya qo‘shinlari Ukraina shaharlarini raketalardan o‘qqa tuta boshladi. Otishmada tinch aholi orasida qurbonlar bo‘ldi, fuqarolik infratuzilmasi obyektlari jiddiy zarar ko‘rdi, elektr energiyasi uzildi.
Rossiya prezidenti Vladimir Putin Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Mavzuga doir: Polsha Tashqi ishlar vazirligi o‘z fuqarolariga Belarusni tark etishni tavsiya qildi
Izoh (0)