«Дарё»да Қашқадарё вилоятининг Чироқчи туманида туғилган чақалоқ даволаниш учун Самарқанд вилоятидаги шифохонага олиб борилгани ва у ерда дом-даракциз йўқолгани хабар берилганди. Бу ҳақда таҳририятга мурожаат қилган онаизор Зиёда Жовлиева айни кунда фарзандининг на тирик ва на ўликлигини билмаслигини айтганди. «Дарё»га қайта мурожаат қилган Зиёда Жовлиева ҳамда унинг турмуш ўртоғи Отабек Рўзимов Самарқанд шаҳар Ички ишлар бўлими терговчиси мазкур ишни ёпганини, уларнинг фарзанди тирик ёки ўликлиги мавҳум қолаётганини айтмоқда.
Масъулларга мурожаат қилиб, агар менинг болам ўлик бўлса, ўлигини; тирик бўлса тиригини топиб беринг дедим. Қашқадарё вилоят прокуратураси ва вилоят Ички ишлар бошқармаси воқеа бошқа ҳудудда бўлганлигини, шу сабаб воқеани ўрганиш уларнинг ваколатига кирмаслигини айтмоқда. Самарқанд вилояти прокуратураси эса кўмилган чақалоқ Қашқадарёда экани, шу сабаб бу иш билан Қашқадарё прокуратураси шуғулланиши кераклигини айтди, — дейди йўқолган чақалоқнинг отаси Отабек Рўзимов.
2022 йилнинг 27 июнь куни бу ҳақда Бош прокуратурага мурожаат қилдик. Шундан сўнг 2 июль куни ҳолат юзасидан жиноят иши қўзғатилди, тергов ҳаракатлари бошланди. Биз дастлаб бошқа болани ДНК қилганмиз. 21 сентябрь куни Самарқанд шаҳар Ички ишлар бўлими терговчиси Жўрабек Пардаев бизни чақириб, ДНК қилинган бола бизнинг фарзандимиз эмаслигини, бола Эъзоза Умаровага тегишли бўлиб чиққанини айтди. Шу сабаб ишни ёпамиз деди. Кейинроқ билсак, терговчи бизни чақиришидан бир кун аввал 20 сентябрь куни ишни ёпиш бўйича қарор чиқарган экан, — дейди Отабек Рўзимов.Боласи йўқолганини айтаётган Зиёда Жовлиева фарзанди соғлом туғилганини, буни шифокорларнинг ўзи айтганини, шунга қарамасдан улар фарзандини Самарқандга юборганини билдирмоқда.
Боламни тиббий кўрикдан ўтказган шифокорлар унинг соғломлигини айтганди. Лекин шунга қарамасдан Чироқчи туман шифохонасида вакуум йўқлигини сабаб қилиб кўрсатиб, «Болангнинг эртага соғлиғи ёмонлашиши мумкин, шундай пайтда бизга вакуум керак бўлади», дея Самарқандга юборишди. Қон босимим ошиб кетгани сабаб менга рухсат беришмагач, боламни эрим ва онам олиб кетди. Турмуш ўртоғимнинг машинасида Эъзоза Умарова исмли аёлнинг эгизак фарзандлари ҳам олиб кетилган. Самарқандда чақалоқларни Мавлуда Ҳасанова исмли ҳамшира қабул қилиб олган. Ва уч нафар чақалоқ ўша пайтда тиббий кўрикдан ўтказилган ҳамда айнан ўша пайтда алмаштирилган, — дейди Зиёда Жовлиева.Боласини йўқотган онанинг айтишича, у Самарқандга — фарзанди ётган шифохонага 2022 йилнинг 19 май куни борган.
Шифохонага борган куним қўлимга бегона чақалоқ беришди. Мен ўша пайтда бола меники эмас, бу бола бегона экан дедим. Азиза опа эса «Мен болаларни алмаштирмадим, шу бола сеники», деб ўз оғзи билан айтди. Менга берилган бола йиғлаб, кўкариб қоларди. Менинг боламда эса бунақа одат ва касаллик йўқ эди. 23 майгача шубҳа-гумонлар билан яшадим. 23 май куни кетаётганимизда эса Эъзоза менинг қўлимдаги бола уники эканлигини айтиб, ташлаб кетишимни талаб қилди, — дейди Зиёда Жовлиева.Йўқолган боланинг отаси Отабек Рўзимовнинг маълумот беришича, у 2022 йилнинг 6 октябрь куни яна Бош прокуратурага мурожаат қилган. Шундан сўнг Қашқадарё ҳамда Хоразм вилояти прокуратурасидан унга телефон қилишиб, Қашқадарё прокуратураси иш Самарқанд вилояти прокуратураси томонидан кўриб чиқилганини, шу сабаб ишни қайта кўрмасликларини айтган. Хоразм вилояти прокуратураси эса тергов хулосасини сўраш билан кифояланган.
Менинг болам тирик, мен буни яхши биламан. Шу сабаб прокуратурадан боламни топиб беришларини, агар боламни ўлган дейишса, унинг мурдасини топиб беришларини сўраб, ота сифатида болам учун аза тутишим кераклигини айтмоқчиман. Шифокорлар хатоси сабаб юрак нуқсони билан туғилган болалар ўрнига менинг болам олиб қўйилган. Юрак нуқсони билан туғилган эгизаклар эса вафот этишган, — дейди у.Мурожаатчининг айтишича, Эъзоза Умарованинг қўлидаги бола уники эканлигига шубҳа қилиб, ДНК текшируви ўтказилган. Аммо эр-хотин бу ДНК хулосасига ишонмаяпти.
Тўғри, Хадича Сулаймонова номидаги Республика суд экспертизаси маркази томонидан ДНК қилишди. Бола Эъзоза Умарованики эканини айтишди. Аммо мен бу ДНК хулосасига ишонмаяпман. Шу сабаб хусусий клиникада яна ДНК қилиб кўрмоқчиман. Менга шу имкониятни беришларини сўрайман. Ва прокуратурадан ҳам ҳеч кимда шубҳа қолмаслиги учун ишни охиригача олиб боришларини илтимос қиламан, — дейди ота.
Зиёда Жовлиева ҳам Эъзоза Умарованинг қўлидаги болани қайта ДНК қилмоқчи эканликларини айтмоқда.
Эъзоза Умарованинг қўлидаги болани яна ДНК қилсак, ҳақиқат ойдинлашади. Дастлабки текширувда мендан 10 та, эримдан 14 та таҳлил олинган. Аммо Эъзоза Умаровадан умуман таҳлил олинмасдан унинг боласи бўлиб чиқиши мумкинми? Қолаверса, эгизакларнинг ҳар иккисида юрак нуқсони бўлган. Менинг боламда эса бунақа касаллик бўлмаган. Ҳозир шу болани шифокор кўригидан ўтказиб, юрагини текширтирсак, нуқсонсиз бўлиб чиқади. Мен бу бола ўзимники эканлигига ишонаман. Шу сабаб прокуратурадан ишни қайта кўриб, бизда ҳам шубҳа қолмаслиги учун қайта ДНК қилишимизга, болани шифокорлар кўригидан ўтказишга рухсат беришларини сўрайман, — дейди Зиёда Жовлиева.Отабек Рўзимов шифокорлар хатога йўл қўйганини, шу сабаб отаси ва аёлининг соғлиғида муаммолар пайдо бўлганини айтмоқда.
Шифокорлар хатоси билан болам алмашиб қолди. Отам шу сабаб инсульт бўлди. Хотиним эса тушкунликдан чиқолмаяпти, тентак бўлиб қолиши мумкин. Хўш, айтинг-чи, мен нима қилай энди?, — дейди боласи йўқолганини айтаётган ота.Боласи йўқолган она беш ойдан бери боласидан йироқда яшаётганини, бу унга оғир ботаётганини билдирмоқда.
Беш ойдан бери боламдан йироқда яшаяпман. Она сифатида бу мен учун жуда оғир. Хотин-қизларнинг дардини тинглаб, уларга ёрдам берадиганлар борми? Илтимос, онаизорни эшитиб, адолатли қарор чиқаришсин, — дейди Зиёда Жовлиева.
Изоҳ (0)