АҚШ президенти Жо Байден ОПЕК+нинг 2022 йилнинг ноябрь ва декабрь ойларида нефть қазиб олиш квоталарини қисқартириш ҳақидаги қароридан сўнг Вашингтон ва Ар-Риёд ўртасидаги муносабатларни қайта кўриб чиқиш имкониятини маълум қилди. Бу ҳақда АҚШ Миллий хавфсизлик кенгаши вакили Жон Кирби маълумот берди, дея хабар беради Reuters.
«Президент бу муносабатларни қайта кўриб чиқишимиз кераклигини аниқ айтди», — деди Жон Кирби.
Кирбининг тушунтиришича, Байден ОПЕК+ қароридан «ҳафсаласи пир бўлган» ва Саудия Арабистони билан муносабатлар келажакда қандай бўлишини ҳал қилиш учун Конгресс билан ҳамкорлик қилиш ниятида.
Аввалроқ ОПЕК+ келишувида иштирок этувчи давлатлар 2022 йилнинг ноябрь ва декабрь ойларида нефть қазиб олиш квотасини кунига 2 миллион баррелга камайтиришга келишиб олган эди. Қарор «жаҳон иқтисодиёти ва нефть бозорининг ноаниқ прогнозлари ҳамда нефть бозори бўйича узоқ муддатли прогнозларни яхшилаш заруратидан келиб чиққан ҳолда» қабул қилинганди.
Байден бу қарорни «узоқни кўролмаслик» деб атади ва Конгресс билан ОПЕКнинг энергия нархлари устидан назоратини камайтириш учун қўшимча воситаларни муҳокама қилишга ваъда берди. АҚШ Конгресси Вакиллар палатасининг Демократик партиядан бир гуруҳи аъзолари ОПЕК+нинг нефть қазиб олишни қисқартириш ҳақидаги қарорига жавобан БАА ва Саудия Арабистонидан Америка қўшинларини олиб чиқишни таклиф қилди, деб ёзади Washington Times.
Сенатнинг ташқи алоқалар қўмитаси раиси Роберт Менендез Саудия Арабистонини қурол-яроғ етказиб бериш ва хавфсизлик соҳасидаги ҳамкорликка тўсқинлик қилиш билан таҳдид қилди. Унинг сўзларига кўра, Ар-Риёд «бу можарода иккала томон фойдасига ҳам ўйнай олмайди».
Изоҳ (0)