AQSH prezidenti Jo Bayden OPEK+ning 2022-yilning noyabr va dekabr oylarida neft qazib olish kvotalarini qisqartirish haqidagi qaroridan so‘ng Vashington va Ar-Riyod o‘rtasidagi munosabatlarni qayta ko‘rib chiqish imkoniyatini ma’lum qildi. Bu haqda AQSH Milliy xavfsizlik kengashi vakili Jon Kirbi ma’lumot berdi, deya xabar beradi Reuters.
“Prezident bu munosabatlarni qayta ko‘rib chiqishimiz kerakligini aniq aytdi”, — dedi Jon Kirbi.
Kirbining tushuntirishicha, Bayden OPEK+ qaroridan “hafsalasi pir bo‘lgan” va Saudiya Arabistoni bilan munosabatlar kelajakda qanday bo‘lishini hal qilish uchun Kongress bilan hamkorlik qilish niyatida.
Avvalroq OPEK+ kelishuvida ishtirok etuvchi davlatlar 2022-yilning noyabr va dekabr oylarida neft qazib olish kvotasini kuniga 2 million barrelga kamaytirishga kelishib olgan edi. Qaror “jahon iqtisodiyoti va neft bozorining noaniq prognozlari hamda neft bozori bo‘yicha uzoq muddatli prognozlarni yaxshilash zaruratidan kelib chiqqan holda” qabul qilingandi.
Bayden bu qarorni “uzoqni ko‘rolmaslik” deb atadi va Kongress bilan OPEKning energiya narxlari ustidan nazoratini kamaytirish uchun qo‘shimcha vositalarni muhokama qilishga va’da berdi. AQSH Kongressi Vakillar palatasining Demokratik partiyadan bir guruhi a’zolari OPEK+ning neft qazib olishni qisqartirish haqidagi qaroriga javoban BAA va Saudiya Arabistonidan Amerika qo‘shinlarini olib chiqishni taklif qildi, deb yozadi Washington Times.
Senatning tashqi aloqalar qo‘mitasi raisi Robert Menendez Saudiya Arabistonini qurol-yarog‘ yetkazib berish va xavfsizlik sohasidagi hamkorlikka to‘sqinlik qilish bilan tahdid qildi. Uning so‘zlariga ko‘ra, Ar-Riyod “bu mojaroda ikkala tomon foydasiga ham o‘ynay olmaydi”.
Izoh (0)