Шимолий Корея етакчиси Ким Чен Ин тактик ядро бўлинмаларининг ҳарбий тайёргарлигини кўздан кечирди, деб хабар бермоқда Корея марказий телеграф агентлиги.
Агентлик хабарига кўра, Шимолий Корея раҳбари 25 сентябрдан 9 октябргача бўлиб ўтган машғулотларда иштирок этган.
«Бу ҳарбий тийиб турувчи воситамизнинг оператив тайёргарлиги синови, шу билан бирга, давлатимиз ядровий мудофаа тизимининг ишончлилиги ва тайёрлигини исботлаш», — дея Ким Чен Индан иқтибос келтиради марказий телеграф агентлиги.
Унинг сўзларига кўра, сўнгги машғулотлар Шимолнинг ядровий жавоб беришга тайёрлигини «аниқ қилиб намойиш этган».
Хабарларга кўра, Ким Чен Ин АҚШ ва Жанубий Корея билан музокаралар олиб боришдан манфаатдор эмаслигини очиқ айтган.
«Бизда душманлар билан мулоқот қилиш учун асос йўқ, бунга эҳтиёж ҳам сезмаяпмиз», — дея унинг сўзларини келтиради ОАВ.
Корея ярим оролидаги кескинлик охирги пайтларда кучайди. Пхеньян сентябрь ойи охиридан бери Жанубий Корея ва АҚШнинг ҳарбий машғулотларига жавобан мунтазам равишда баллистик ракета учирмоқда. Шунингдек, Шимолий Корея яқин келажакда ядровий синов ўтказиши мумкинлигидан хавотирлар кучаймоқда.
Жанубий Корея, Япония ва Ғарб давлатлари бундай хатти-ҳаракатларни танқид қилиб, улар БМТ Хавфсизлик Кенгашининг КХДР бўйича қабул қилган резолюцияларини бузаётганини таъкидламоқда.