Қрим кўпригида 8 октябрь куни эрталаб содир бўлган портлаш Украина махсус хизматлари томонидан уюштирилган, деб ёзмоқда The New York Times исми сир қолишни истаган украиналик юқори мартабали амалдорга таяниб.
Нашр суҳбатдошининг айтишича, Украина махсус хизматлари кўприк бўйлаб кетаётган юк машинасига бомба ўрнатган.
Портлашда Украина Хавфсизлик хизматининг қўли борлиги ҳақида аввалроқ «Украинская правда» ва «УНИАН» нашрлари ҳуқуқ-тартибот органларидаги манбаларга таяниб хабар берганди. Шунингдек, The Washington Post газетаси ёзишича, украиналик юқори мартабали амалдор портлаш ортида Украина турганини тасдиқлаган.
Украина махсус хизматлари Қрим кўпригидаги портлаш учун жавобгарликни расман зиммасига олганича йўқ.
Қрим кўпригидаги портлаш
8 октябрь куни эрталаб Қрим кўпригида юк машинаси портлаб кетди. Оқибатда кўприкнинг автомобиллар юрадиган қисмида бир нечта таянчлар оралиғи қулаб тушди, шунингдек, кўприкдаги темир йўл орқали кетаётган цистернали таркиб ёниб кетди. Ёнғин оқибатида бир километрдан ортиқ темир йўл (кўприк узунлиги тахминан 19 километр) зарар кўрган. Тергов маълумотларига кўра, портлаш вақтида юк машинаси ёнидан ўтаётган машинада ичидаги уч киши ҳалок бўлган.
8 октябрь оқшомида Қрим ҳукумати Қрим кўприги бўйлаб автомобиллар ва поездлар ҳаракатини тиклагани, шу билан бирга юк машиналари ҳамон ўтказилмаётганини маълум қилди. Қрим ва Краснодар ўлкаси ўртасида паром қатнови ташкил этилган.
Изоҳ (0)