Беларусь давлат назорати қўмитаси президент Александр Лукашенконинг мамлакатда нархларни оширишни тақиқлаш ҳақидаги буйруғидан сўнг бир қатор шундай қоидабузарликларни фош қилди. Мамлакатда озиқ-овқат маҳсулотлари нархини ошириб юбориш бўйича биринчи жиноий иш очилди, деб хабар бермоқда «Беларусь-1» телеканали.
Қўмита ходимлари мамлакат шимоли-ғарбида жойлашган Лида шаҳридаги дўконлардан бирида қоидабузарликларни аниқлади. Маълум бўлишича, у ерда колбаса нархи маҳсулот таннархини ошириш тақиқланганидан кейин ҳам ошган. Яна бир жиноий иш Могилев вилоятида қўзғатилган.
Беларусь президенти Александр Лукашенко 6 октябрдан бошлаб мамлакатда нархларни оширишни тақиқлашни буюрган эди. Иқтисодчи Абдулла Абдуқодиров президентнинг ушбу қарори юзасидан ўз мулоҳазаларини билдириб, «менежерлар отиб ташланган тақдирда ҳам, омиллар мавжуд бўлса», нарх ошаверишини айтганди.
Шу билан бирга BusinessDrom таҳлилий агентлиги бош директори Павел Самиев, агар Лукашенконинг нархларни оширишга қўйган тақиқи узоққа чўзилса, Беларусда товар тақчиллиги ва қора бозор пайдо бўлиши мумкинлиги ҳақида огоҳлантирган.
Изоҳ (0)