Тошкентда бир нечта судья қўлга олингани ҳақидаги хабарларга изоҳ берилди

Ижтимоий тармоқларда Тошкент туманлараро иқтисодий судидан бир нечта судья ушлангани ва қамоққа олингани ҳақида хабарлар тарқалди. Ушбу хабарга ойдинлик киритиш мақсадида «Дарё» мухбири тегишли идоралардан изоҳ олди.

Олий суд ахборот хизмати раҳбари Азиз Обидовнинг маълум қилишича, айни вақтда Тошкент туманлараро иқтисодий судида фаолият олиб бораётган судьялар орасида ҳуқуқни муҳофаза қилувчи органлар томонидан қамоққа олинган, терговга жалб қилинган ва жиноят иши қўзғатилган судьялар йўқ.

Бош прокуратура ахборот хизмати бошлиғи Ҳаёт Шамсутдинов ҳолат ҳақиқатан бўлгани ҳақида на инкор, на тасдиқ жавобини берди.

«Тергов сири нуқтаи назаридан маълумотлар ошкор қилинмайди. Лозим топилганда тергов якуни бўйича маълумотлар жамоатчиликка эълон қилинади», — деди Ҳаёт Шамсутдинов.

Ҳуқуқшунос Саидали Мухторалиевнинг ўз Telegram каналида маълум қилишича, ҳақиқатан ҳам шундай тадбир ўтказилган.

«Мендаги маълумотларга кўра, улар Тошкент туманлараро иқтисодий суд судьялари эмас, балки шу судда аввал ишлаган судьялар», — деб ёзган ҳуқуқшунос.