Қисман сафарбарлик эълон қилинганидан бери россияликлар мамлакатдан ноқонуний равишда пул олиб чиқишга икки баравар кўп ҳаракат қилган. Бу ҳақда Федерал божхона хизмати маълумотларига таяниб «Известия» хабар бермоқда.
Қайд этилишича, сентябрнинг охирги 10 кунида чегарадан нақд валютани ноқонуний олиб ўтиш бўйича 557 та ҳолат аниқланган. Россияликларнинг кўпчилиги Ўзбекистон, Туркия, Бирлашган Араб Амирликлари ва Тожикистонга нақд пул олиб киришга уринган.
Мамлакатда ноқонуний пул олиб ўтишга уриниш ҳолати 2021 йилнинг шу даврида 228 тани ташкил этган.
Қонунбузарликлар сонининг кўпайиши йўловчилар оқимининг ортиши билан боғлиқ. Шунингдек, бунга улар томонидан кўрилган нохолис чоралар туфайли банклар орқали пул ўтказмаларини амалга ошириш ва Россия карталаридан фойдаланиш имконсизлиги ҳам таъсир кўрсатди, — дейилади божхона хабарида.
20—30-сентябр кунлари аниқланган ҳуқуқбузарлик ҳолатлари бўйича 549 та маъмурий ва 11 та жиноят иш қўзғатилган. Ноқонуний олиб ўтилган пулларнинг умумий миқдори 160,5 млн рублни (тахминан 29,2 млрд сўм) ташкил этган.
Қонунбузарликларга фуқаролар томонидан олиб ўтилган нақд пул миқдорини декларация қилмаслик ёки нотўғри кўрсатиш, шунингдек, Россиядан 10 минг доллардан ортиқ хорижий валютани олиб чиқиб кетиш ҳолатлари киради.
Бундай уринишларнинг ярмида россияликлар аввал рублни, кейин эса евро ва долларни мамлакатдан олиб чиқиб кетишга ҳаракат қилган.
Аввалроқ Россиянинг ЕИга ёнилғи етказиб беришни тўхтатиши Ўзбекистон иқтисодиётига қандай таъсир қилиши ҳақида хабар берилганди.
Изоҳ (0)