Qisman safarbarlik e’lon qilinganidan beri rossiyaliklar mamlakatdan noqonuniy ravishda pul olib chiqishga ikki baravar ko‘p harakat qilgan. Bu haqda Federal bojxona xizmati ma’lumotlariga tayanib “Izvestiya” xabar bermoqda.
Qayd etilishicha, sentabrning oxirgi 10 kunida chegaradan naqd valyutani noqonuniy olib o‘tish bo‘yicha 557 ta holat aniqlangan. Rossiyaliklarning ko‘pchiligi O‘zbekiston, Turkiya, Birlashgan Arab Amirliklari va Tojikistonga naqd pul olib kirishga uringan.
Mamlakatda noqonuniy pul olib o‘tishga urinish holati 2021-yilning shu davrida 228 tani tashkil etgan.
Qonunbuzarliklar sonining ko‘payishi yo‘lovchilar oqimining ortishi bilan bog‘liq. Shuningdek, bunga ular tomonidan ko‘rilgan noxolis choralar tufayli banklar orqali pul o‘tkazmalarini amalga oshirish va Rossiya kartalaridan foydalanish imkonsizligi ham ta’sir ko‘rsatdi, — deyiladi bojxona xabarida.
20—30-sentyabr kunlari aniqlangan huquqbuzarlik holatlari bo‘yicha 549 ta ma’muriy va 11 ta jinoyat ish qo‘zg‘atilgan. Noqonuniy olib o‘tilgan pullarning umumiy miqdori 160,5 mln rublni (taxminan 29,2 mlrd so‘m) tashkil etgan.
Qonunbuzarliklarga fuqarolar tomonidan olib o‘tilgan naqd pul miqdorini deklaratsiya qilmaslik yoki noto‘g‘ri ko‘rsatish, shuningdek, Rossiyadan 10 ming dollardan ortiq xorijiy valyutani olib chiqib ketish holatlari kiradi.
Bunday urinishlarning yarmida rossiyaliklar avval rublni, keyin esa yevro va dollarni mamlakatdan olib chiqib ketishga harakat qilgan.
Avvalroq Rossiyaning YIga yonilg‘i yetkazib berishni to‘xtatishi O‘zbekiston iqtisodiyotiga qanday ta’sir qilishi haqida xabar berilgandi.
Izoh (0)