Rossiyadan YI mamlakatlariga yonilg‘i yetkazib berishning to‘xtatilishi Yevropa va Markaziy Osiyo davlatlarida 2023-yilda yalpi ichki mahsulotning 1,2 foiz darajaga qisqarishiga olib kelishi mumkin. Bu haqda “Daryo”ga Jahon banki hisobotidan ma’lum bo‘ldi.
Ushbu vaziyatning turli mamlakatlarga ta’sir qilish darajasi ularning Rossiya gaziga bog‘liqligi va Yevropa yoki Rossiya bilan iqtisodiy aloqalariga daxldor bo‘ladi.
Yetarlicha energiya ishlab chiqaradigan va muqobil ta’minot yo‘llaridan foydalanadigan mamlakatlarga bu kamroq ta’sir qiladi.
Tahlilchilarning tushuntirishicha, Rossiya gazining Yevropaga yetkazib berilishi to‘xtatilishi munosabati bilan Markaziy Osiyo mamlakatlari iqtisodlari keyinchalik tabiiy gaz narxi va Yevropadagi ancha zaif faollikning salbiy yon ta’siri tufayli aziyat chekadi.
Iqtisodiy faollikning sekinlashishiga xalqaro moliyalashtirish shartlarining o‘zgarishi, shuningdek, keskin pul-kredit siyosati ham ta’sir ko‘rsatadi.
Shunga qaramay, 2022-yilda O‘zbekiston iqtisodiyoti 5,3 foizga o‘sishi kutilmoqda.
Bank prognozlariga ko‘ra, O‘zbekiston yalpi ichki mahsuloti 2023-yilda 4,9 foiz, 2024-yilda 5,1 foizga o‘sishi kutilmoqda.
Bank tomonidan iyun oyida e’lon qilingan hisobotda mamlakat iqtisodiyoti 2022-yilda 4,3 foizga, 2023-yilda 5,3 foizga, 2024-yilda esa 5,5 foizga o‘sishi kutilayotgan edi.
Ta’kidlanishicha, O‘zbekiston so‘nggi yillarda savdo va narxlarni erkinlashtirish bo‘yicha dastlabki ulkan islohotlarni amalga oshirgan.
Jahon bankining ma’lum qilishicha, mahsuldorlikni, xususiy sektor boshchiligidagi o‘sishni rag‘batlantirishni davom ettirish va ish o‘rinlari yaratish uchun qo‘shimcha islohotlar zarur.
Izoh (0)