Наманганда ўқувчи ўқитувчини калтаклагани ҳақида хабар берилган эди. Вилоят халқ таълими бошқармаси ахборот хизматининг маълум қилишича, ўқитувчисига қўл кўтарган ўқувчининг ота-онасига чора кўрилди.
Косонсой тумани халқ таълими бўлимига қарашли 29-сонли мактабда 19 сентябрь куни содир бўлган воқеа бўйича ўрганиш ишлари олиб борилган. Маълум бўлишича, ижтимоий тармоқларда тарқалган видеодаги ҳолат физика дарсида содир этилган.
Физика фани ўқитувчиси дарс ўтаётганда ўқувчи ўқитувчининг дарс ўтишига халақит берган. Шунда ўқитувчи ўқувчини дарсдан чиқариб, мактабнинг маънавий-маърифий ишлар бўйича директор ўринбосарига суҳбатлашиш учун топширган.
Бироз вақт ўтгандан сўнг ўқувчи синф хонасига қайтиб кирган ва видеода акс этгани каби ўқитувчига ташланган. Синфдаги бошқа ўқувчилар уларни ажратишга ҳаракат қилган.
Ҳолат юзасидан туман ИИБ бўлими ва туман халқ таълими бўлими ходимлари мактабда ўрганиш олиб борган ва тегишли тартибда ўқувчининг ота-онасига нисбатан Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) 1-қисми билан маъмурий жавобгарликка тортилди.
Шунингдек, халқ таълими бўлими ва мактаб раҳбарларига ўқитувчи ва ўқувчилар ўртасида ўзаро ҳурмат ва белгиланган тартиб қоидалар асосида дўстона муносабат ўрнатилишини таъминлаш бўйича тегишли кўрсатмалар берилди.
Изоҳ (0)