«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда янги — «Маҳалла. Муаммо. Мулоҳаза» лойиҳасини бошлади. Кўрсатувнинг 1-сонида кенгаш раиси Фурқат Маҳмудхўжаев ва депутат Расул Кушербаев автотураргоҳлар, тирбандликлар мавзусига доир муаммолар бўйича фикр алмашди.
Суҳбат давомида Фурқат Маҳмудхўжаев шаҳарсозлик инфратузилмасини ривожлантириш, йўллардаги тирбандликларнинг олдини олиш бўйича таклифларини билдирди. Хусусан, у машиналар оқимини камайтириш бўйича фикрларини илгари суриб, ходимларни ишга автомобилсиз келишга ундаш кераклигини айтди.
— Мана идоралар, йирик компаниялар, оддий ташкилотлар, кичик тадбиркорлик субъектларими, шулар ходимларини ишга автомобилсиз келишини рағбатлантириш тизимини йўлга қўйиши керак. Тўғри, бу — илтимос, ҳеч ким мажбур қилолмайди. Кейин, ишхонага автомобилсиз келдимми, бунинг қанақадир компенсацияси ҳам бўлсин. Балки келажакда қайсидир компаниялар шу усулдан фойдаланар.
— Марҳамат, метрода келиш учун бир ойлик чипта олиб берсин. Ёки майли, қайсинг машинасиз келсанг, 10—15 дақиқа кечиксанг ҳам индамаймиз, десин.
— Балки моддий рағбатлантириш ҳам бўлар. Тўғри, бюджет ташкилотида иложи йўқ, лекин хусусийларда қилса бўлади.
— Албатта, менга ҳам бу таклиф жуда ёқди. Ўзи вақти-соати келиб, бизнинг одамлар ҳам тушунадики, автомобиль ҳашам, ҳавас воситаси эмас, балки ҳаётни қулайлаштирадиган нарса. Ана ўшанда жамоат транспортига эҳтиёж ошади. Тўғрисини айтиш керак, Тошкентда бу соҳа яхши эмас. Метро, бироз автобуслар бор холос. Биз кўп соҳасини ўлдириб қўйдик. Илгари троллейбус, трамвайлар бўларди. Биз бу масалани қайта кўришимиз керак.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)