Адабиёт бўйича 2022 йилги Нобель мукофотига француз ёзувчиси Анни Эрно сазовор бўлди. Бу ҳақда Нобель қўмитаси Twitter’да хабар берди.
Эрно «жасорат ва клиник аниқлик билан инсон хотирасининг манбалари, коллектив чекловлари ва бегоналашувини очиб бергани учун» мукофотланмоқда.
«Эрнонинг барча китоблари — автобиографик. Ҳаммаси унинг шахсий, доимо оғриқли ва ҳатто травматик тажрибасини тасвирлайди. Бу матнлар ўзига хос терапевтик мактублар бўлиб, улар ёрдамида Эрно воқеаларда яшайди, тажриба тўплайди, оғриқдан халос қилади», — дейди унинг «Воқеалар» ва «Аёл» китобларини таржима қилган Мария Красовицкая.
Анни Эрно «Ҳодиса», «Аёл», «Оддий эҳтирос», «Йиллар», «Ташқи ҳаёт» ва бошқа романлар муаллифи.
2021 йилда адабиёт бўйича Нобель мукофоти Буюк Британияда яшаб, ижод қилаётган танзаниялик ёзувчи Абдураззоқ Гурнага «мустамлакачиликнинг муросасиз оқибатлари ҳамда маданиятлар ва қитъалараро сарсон бўлаётган қочоқлар қисматини ўз асарларида ёритгани учун» берилганди.
7 октябрь куни Ослода тинчлик бўйича мукофот соҳиби маълум бўлади. 10 октябрда эса иқтисодиёт бўйича Нобель мукофотини ким олгани эълон қилинади.
Мукофотларни топшириш маросими 10 декабрда — мукофот таъсисчиси Алфред Нобель вафот этган кунда бўлиб ўтади. Одатда совриндорлар мукофотларни Швеция қироли Карл XVI Густав иштирокидаги тантанали маросимда шахсан қабул қилиб олади. Бироқ 2020 ва 2021 йилларда коронавирус пандемияси туфайли, маросим видеоформатда ўтказилганди.
Изоҳ (0)