Масс-медиа фондида АҚШ давлат котибининг жамоатчилик билан алоқалар бўйича ёрдамчиси вазифасини бажарувчи Элизабет Кеннеди Трюдо билан учрашув бўлди. Бу ҳақда Масс-медиа фонди васийлик кенгаши раиси ўринбосари Саида Мирзиёева ўз Telegram каналида хабар берди.
Менга америкалик меҳмоннинг қуйидаги мулоҳазаси жуда ёқди: «Биз америкаликлар сизга нима қилиш кераклигини ўргатишга келганимиз йўқ. Биз ҳамкорлик учун шу ердамиз. Ва биз сизни ишончли ҳамда тенг ҳуқуқли шериклар деб биламиз». Ишончим комилки, олдимизда сермаҳсул ҳамкорлик турибди, — дейди васийлик кенгаши раиси ўринбосари.
Аввалроқ Президент администрацияси раҳбари ўринбосари Комил Алламжонов АҚШ давлат котибининг жамоатчилик билан алоқалар бўйича ёрдамчиси вазифасини бажарувчи Элизабет Трюдо билан учрашгани ҳақида хабар берилган эди.
Элизабет Трюдо етакчи дипломат бўлиб, аввал Шимолий Ирландия ва Покистондаги АҚШ Бош консули, АҚШнинг НАТОдаги миссияси маслаҳатчиси, АҚШнинг Жанубий Африкадаги миссияси матбуот атташеси, Давлат департаменти матбуот ишлари бўйича директори лавозимларида ишлаган. Ҳозирги лавозимига қадар у мудофаа вазирининг жамоатчилик билан алоқалар бўйича ёрдамчисининг биринчи ўринбосари лавозимида фаолият юритган.
У бошчилигидаги АҚШ делегацияси Ўзбекистонга тўрт кунлик ташриф билан келганди.
Изоҳ (0)