Фарғона шаҳрида Жанубий Корея компанияси томонидан барпо этилган ёшлар таълим маркази фойдаланишга топширилди. Бу ҳақда «Дарё» мухбири Азизжон Эрматов хабар берди.
Қайд этилишича, Posco International Textile компанияси томонидан марказ қурилиши ва жиҳозлаш ишлари учун 550 минг доллар миқдорида маблағ сарфланган.
Саккиз ойда қурилиб, фойдаланишга топширилган марказда яқин ҳудудларда яшовчи ёшларга инглиз тили ва ахборот технологиялари бўйича 3 ойлик бепул ўқув курслари ташкил этилган. Ҳозирда бу йўналишда 20 нафар ўқувчи қабул қилинган бўлса, келгусида уларнинг сони 60 нафарга етади.
Шунингдек, марказда Posco International Textile корхонасида фаолият олиб борувчи ходимлар учун касбий малака ошириш курслари ҳам йўлга қўйилиши кўзда тутилган.
Марказнинг фойдаланишга топшириш маросимида Фарғона вилояти ҳокими Хайрулло Бозоров, Корея Республикасининг мамлакатимиздаги фавқулодда ва мухтор элчиси Ким Хи Санг иштирок этди.
Изоҳ (0)