Ўзбекистонда талаба ва ўқувчиларнинг қишки таътилини ташкил этиш тўғрисидаги ҳукумат қарори эълон қилинди.
Унга кўра, декабрь ойининг охирги 10 кунлиги ва январь ойининг биринчи 10 кунлиги оралиғида ўрта махсус, профессионал ва олий таълим муассасалари талаба (ўқувчи)ларига ҳар йилги икки ҳафталик қишки таътили берилади.
Олий ва ўрта махсус таълим вазирлигига мавжуд шароитдан келиб чиқиб ўқувчи ва талабаларга таътил бериш муддатини ўзгартириш ҳуқуқи берилади.
Байрам кунлари ва қишки таътил даврида талабалар турар жойларида қолаётган талабаларнинг хавфсизлиги ва бўш вақтини унумли ўтказиши, шунингдек, овқатланиши мазкур ОТМнинг бюджетдан ташқари маблағлари ҳисобидан амалга оширилади.
Талаба ва ўқувчиларга қўшимча қулайлик яратиш ҳамда уларнинг ҳудудларга ҳаракатланиш имкониятини ошириш мақсадида қишки таътил кунлари уларнинг уйларига боришлари ва ўқишга ўз вақтида қайтиб келишлари учун транспорт воситалари қатнови вақтинча кўпайтирилади.
«Ўзбекистон темир йўллари» ҳамда Uzbekistan Airways’га қишки таътил бошланишидан 10 кун аввал талабалар учун чипталарга 50 фоиз чегирмалар эълон қилиш тавсия этилган.
Изоҳ (0)