Bloomberg: Венгрия Газпромга газ учун 1,9 млрд евро тўловни кечиктиради

Венгрия ва Газпром 1,9 млрд евро миқдоридаги тўловни кечиктиришга келишиб олди. Бу ҳақда Bloomberg хабар бермоқда.

 Венгрия расмийларининг баёнотларига кўра, кечиктирилган тўловда ҳеч қандай чеклов йўқ. 

Аввалроқ ОАВ Венгриянинг МВМ компанияси Газпром билан тўловларни уч йилга кечиктириш бўйича шартнома тузгани ҳақида хабар берган эди.

Агентликнинг ёзишича, 2022—2023 йиллар қиш мавсумида Будапешт кечикишларни ҳисобга олмаган ҳолда, Россия гази учун 4 млрд евро тўлайди. 

Bloomberg’нинг икки аноним манбасига кўра, биринчи йилда Венгрия газнинг 20 фоизини тўлайдии, кейинги икки йил ичида 40 фоизини.

3 октябрь куни Венгрия Index портали МВМ энергетика компанияси келгуси қиш даври учун Газпром билан газ учун тўловларни кечиктириш бўйича шартнома тузганини хабар қилди. Кечиктирилган битим уч йил муддатга амал қилади.

31 август куни Венгрия ва Газпром ўртасида кунига қўшимча 5,8 млн куб метр газ етказиб бериш бўйича келишув имзоланган эди. Шартнома 1 сентябрдан бошлаб амал қилади.