Россияда «қисман сафарбарлик» эълон қилинганидан кейин Қозоғистонга 200 мингдан ортиқ россиялик келган. Бу ҳақда Қозоғистон Ички ишлар вазирлиги раҳбари Марат Ахметжановга таяниб, Meduza хабар қилди.
Шу билан бирга, вазир Қозоғистонни кейинчалик тарк этаётган Россия фуқаролари сони ҳам ортиб бораётганини, умуман олганда, чегаралардаги вазият аллақачон нормал ҳолатга қайтганини таъкидлади.
«Жами 200 мингдан ортиқ Россия фуқароси Қозоғистонга кирди, бугун эса 147 минг нафари мамлакатни тарк этди. Кеча етти мингдан ортиқ Россия фуқаролари мамлакатимизга кирган, 11 мингга яқини чиқиб кетган. Келганлар кетмоқда. Ҳаммаси иммиграция назорати остида», — — деди Ахметжанов.
Бир ҳафта олдин Қозоғистон Ички ишлар вазирлиги сафарбарлик эълон қилинганидан кейин мамлакатга келган россияликлар сонини 98 минг киши, чиқиб кетганларни эса 64 минг киши деб баҳолаган эди.
Қозоғистон президенти Қосим-Жўмарт Тўқаев Россия фуқароларининг республикага оммавий келиши фонида Москва билан музокаралар олиб бормоқчилигини маълум қилганди. Қозоғистон Ички ишлар вазирлиги раҳбари сафарбарликдан бўйин товлаётган фуқаролар халқаро қидирувга берилмаса, уларни Россияга экстрадиция қилмасликка ваъда берган.
Ахметжановнинг сўзларига кўра, сўнгги икки ҳафта ичида 7 нафар россиялик Қозоғистондан чиқариб юборилган – улардан уч нафари чегарани ноқонуний кесиб ўтган, яна тўрт нафари Уралскда майда безорилик қилган.
Изоҳ (0)