Нобель қўмитаси физика бўйича 2022 йилги мукофот совриндорлари номини эълон қилди.
Бу йилги мукофот уч нафар олим — Ален Аспе (Франция), Жон Ф. Клаузер (АҚШ) ва Антон Зайлингерга (Австрия) «чигал фотонлар билан тажриба ўтказгани, Белл тенгсизликларининг бузилишини аниқлагани ва квант информатикасидаги кашфиётлари» учун берилди.
https://twitter.com/НобелPrize/status/1577234271546200064
2021 йили физика бўйича Нобель мукофотининг бир қисми америкалик иқлимшунос Сюкуро Манабе ва германиялик олим Клаус Хасселманга Ер иқлимини физик моделлаштириш ва глобал исишнинг ишончли таҳлили учун, иккинчи қисми эса италиялик физик Жоржо Паризига атомлардан сайёраларгача бўлган физик тизимларда тартиб ва тебранишларнинг ўзаро таъсирини кашф қилгани учун берилган эди.
2022 йилги Нобель ҳафталиги 3 октябрда бошланди. Анъанага кўра, биринчи бўлиб тиббиёт ва физиология бўйича мукофот ғолиблари эълон қилинди. 2022 йилда швед олими Сванте Паабо «йўқ бўлиб кетган гомининлар геноми ва инсон эволюциясига оид кашфиётлар» учун мукофотга сазовор бўлди.
5 октябрь куни кимё, 6 октябрь куни адабиёт бўйича Нобель мукофоти совриндорлари эълон қилинади. 7 октябрь куни эса Ослода тинчлик бўйича мукофот соҳиби маълум бўлади. 10 октябрда эса иқтисодиёт бўйича Нобель мукофотини ким олгани эълон қилинади.
Мукофотларни топшириш маросими 10 декабрда — мукофот таъсисчиси Алфред Нобель вафот этган кунда бўлиб ўтади. Одатда совриндорлар мукофотларни Швеция қироли Карл XVI Густав иштирокидаги тантанали маросимда шахсан қабул қилиб олади. Бироқ 2020 ва 2021 йилларда коронавирус пандемияси туфайли, маросим видеоформатда ўтказилганди.
Изоҳ (0)