Rossiyada “qisman safarbarlik” e’lon qilinganidan keyin Qozog‘istonga 200 mingdan ortiq rossiyalik kelgan. Bu haqda Qozog‘iston Ichki ishlar vazirligi rahbari Marat Axmetjanovga tayanib, Meduza xabar qildi.
Shu bilan birga, vazir Qozog‘istonni keyinchalik tark etayotgan Rossiya fuqarolari soni ham ortib borayotganini, umuman olganda, chegaralardagi vaziyat allaqachon normal holatga qaytganini ta’kidladi.
“Jami 200 mingdan ortiq Rossiya fuqarosi Qozog‘istonga kirdi, bugun esa 147 ming nafari mamlakatni tark etdi. Kecha yetti mingdan ortiq Rossiya fuqarolari mamlakatimizga kirgan, 11 mingga yaqini chiqib ketgan. Kelganlar ketmoqda. Hammasi immigratsiya nazorati ostida”, — — dedi Axmetjanov.
Bir hafta oldin Qozog‘iston Ichki ishlar vazirligi safarbarlik e’lon qilinganidan keyin mamlakatga kelgan rossiyaliklar sonini 98 ming kishi, chiqib ketganlarni esa 64 ming kishi deb baholagan edi.
Qozog‘iston prezidenti Qosim-Jo‘mart To‘qayev Rossiya fuqarolarining respublikaga ommaviy kelishi fonida Moskva bilan muzokaralar olib bormoqchiligini ma’lum qilgandi. Qozog‘iston Ichki ishlar vazirligi rahbari safarbarlikdan bo‘yin tovlayotgan fuqarolar xalqaro qidiruvga berilmasa, ularni Rossiyaga ekstraditsiya qilmaslikka va’da bergan.
Axmetjanovning so‘zlariga ko‘ra, so‘nggi ikki hafta ichida 7 nafar rossiyalik Qozog‘istondan chiqarib yuborilgan – ulardan uch nafari chegarani noqonuniy kesib o‘tgan, yana to‘rt nafari Uralskda mayda bezorilik qilgan.
Izoh (0)