Бухоро вилоятининг Ғиждувон туманида 29 ёшли ўғил 51 ёшда бўлган онасини пичоқлаб ўлдирди, дея хабар бермоқда «Дарё» мухбири.
Таъкидланишича, қотиллик кеча, 2 октябрь куни содир бўлган.
Ғиждувон туманининг «Бобур» маҳалласи, Гулобод кўчасида яшовчи, 1993 йилда туғилган Ҳ.Н. онаси М.О. билан ўзаро келишмовчиликка борган. Келишмовчилик жанжалга айланган. Оқибатда жаҳл отига минган ўғил ошхона пичоғини онасига икки маротаба уриб, унинг ўлимига сабабчи бўлган.
Мазкур қотиллик муҳокамасига бағишланган йиғилишда сўз олган маҳалла вакили Лобар Шарипова ушбу оилада беш нафар фарзанд бўлиб, қотил ўғил учинчи фарзанд эканлигини айтмоқда.
«Қотиллик содир бўлишидан чамаси йигирма кун илгари марҳума туман ободонлаштириш бўлимида фаолият юритиб келаётган турмуш ўртоғи Ҳ.Ҳ. билан ҳам жанжаллашган бўлган. Эри ҳовлидан чиқиб кетган. Айбдор ўғил эса маҳалламиздаги энг яхши пайвандловчилардан эди. Оғир ва вазмин бола. Отаси ҳам, ўзи ҳам ҳеч қачон биров билан келишмовчиликка ёки жанжалга бормаган. Ақлли, эсли ва ҳушли, меҳнаткаш йигит эди», — дейди Лобар Шарипова.
Ҳолат юзасидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, туман прокуратураси томонидан тергов ҳаракатлари олиб борилмоқда.
«Вилоят ИИБ мутасадди раҳбарлари ҳамда туман ҳокими, қатор масъуллар, маҳалла мутасаддилари ва кенг жамоатчилик вакиллари иштирокида жиноят тафсилотлари муҳокама қилинди. Жиноятнинг сабаблари ва унинг келиб чиқишига омил бўлган шарт-шароитлар бирма-бир таҳлил қилинди. Шунингдек, муҳокамада жиноят ва ҳуқуқбузарликларнинг олдини олиш борасида сектор раҳбари, маҳалла мутасаддилари, профилактика инспектори ҳамда бошқа мутасадди идоралар томонидан амалга оширилган ишлар ва йўл қўйилган камчиликлар танқидий кўриб чиқилди», — деди вилоят ИИБ ахборот хизмати раҳбари Шуҳрат Жалолов.
Изоҳ (0)