Шимолий Корея иккита қисқа масофали баллистик ракета учирди. Yonhap агентлигининг Жанубий Корея штаб бошлиқларига таяниб хабар беришича, бу КХДРнинг бир ҳафтадан камроқ вақт ичида тўртинчи марта ракета учириши.
Жанубий Корея ҳарбийларидаги маълумотларига кўра, ракеталар Пхеньяндаги Сунан туманидан соат 06:45 (Тошкент вақти билан 2:45) ҳамда 07:03 оралиғида учирилгани аниқланган.
Ракеталар Япониянинг эксклюзив иқтисодий зонасидан ташқарига тушган бўлиши мумкин, деб хабар бермоқда Kyodo. Япония Мудофаа вазирлиги Шимолий Кореянинг ғарбий соҳиллари яқинида 1 октябрь куни тахминан соат 6:42 дан 6:58 гача иккита баллистик ракета учирилганини тасдиқлади. Вазирлик иккала ракета ҳам КХДР шарқий қирғоқлари яқинидаги Япония эксклюзив иқтисодий зонасидан ташқарига тушган деб ишонмоқда.
Пхеньян охирги марта 25, 28 ва 29 сентябрь кунлари ракета учирган эди. 30 сентябрь, жума куни Жанубий Корея, АҚШ ва Япония Япон денгизида машғулотлар ўтказди. Аввалги куни АҚШ вице-президенти Камала Харрис Жанубий Кореяга бир кунлик ташриф билан келиб, мамлакат президенти Юн Сук Ёл билан учрашган ва қуролсизлантирилган ҳудудга ташриф буюрган эди.
25 сентябрь куни Жанубий Корея ҳарбийлари КХДР қисқа масофага учувчи баллистик ракетани учиргани, у максимал 60 км баландликда 60 мах тезликда 600 км масофани босиб ўтгани ҳақида хабар берган эди.
Изоҳ (0)