Чирчиқ шаҳрида 1 октябрь — Ўқитувчи ва мураббийлар куни муносабати билан шаҳар халқ таълими бўлимининг янги биноси фойдаланишга топширилди. Бу ҳақда тадбирда иштирок этган «Дарё» мухбири хабар берди.
Тадбирда Чирчиқ шаҳри ҳокими Даврон Ҳидоятов сўз олиб, ўқитувчи ва мураббийларни байрам билан қутлади.
«Очиқ бюджет орқали 750 миллион сўм ютиб олинди ва Goog Styles масъулияти чекланган жамияти томонидан шаҳар халқ таълимининг абгор биноси ҳозирги замонавий кўринишга келтирилди. Бунинг учун муҳтарам президентимизга раҳмат айтамиз. Бу ишларнинг барчаси Сиз азиз ўқитувчилар, устозлар учун», — дейди шаҳар ҳокими.
Чирчиқ шаҳар халқ таълими бўлими мудири Назокат Ўразованинг маълумот беришича, халқ таълими биноси таъмири учун 750 миллион сўм сарфланган бўлса, байрам арафасида маҳаллий бюджет маблағлари ҳисобидан 398 миллион сўмга энг замонавий русумдаги компьютер техникалари олиб берилган.
Масъулнинг қўшимча қилишича, 1956 йилда қурилган бино ўтган йиллар давомида умуман капитал таъмирланмаган.
«Ҳурматли президентимиз ҳокимларга топшириқ бериб, ҳоким бир вақтнинг ўзида халқ таълими бўлими мудири ҳам дея таъкидлаганларидан сўнг, шаҳар ҳокими биномизга келиб, бино харобалигидан ҳайратга тушганди. Ва «ҳоким ҳам шу бинода ўтирадими», дея ҳазил қилганди. Шундан сўнг масъулларга топшириқ бериб, халқ таълими фидойилари замонавий, барча қулайликларга эга бинода ишлашлари керак деганди. Мана кўриб турибсиз, бугун шундай бинога эга бўлдик», — дейди Назокат Ўразова.
Тадбир давомида Даврон Ҳидоятовга таълимга эътибори сабаб вилоят халқ таълими бошқармасининг ташаккурномаси топширилди.
Тадбирнинг расмий қисмидан сўнг шаҳардаги «Кимёгарлар» маданият саройида ўқитувчи ва мураббийларга бағишланган концерт дастури намойиш этилди.
Изоҳ (0)