Chirchiq shahrida 1-oktabr — O‘qituvchi va murabbiylar kuni munosabati bilan shahar xalq ta’limi bo‘limining yangi binosi foydalanishga topshirildi. Bu haqda tadbirda ishtirok etgan “Daryo” muxbiri xabar berdi.
Tadbirda Chirchiq shahri hokimi Davron Hidoyatov so‘z olib, o‘qituvchi va murabbiylarni bayram bilan qutladi.
“Ochiq budjet orqali 750 million so‘m yutib olindi va ‘Good styles” mas’uliyati cheklangan jamiyati tomonidan shahar xalq ta’limining abgor binosi hozirgi zamonaviy ko‘rinishga keltirildi. Buning uchun muhtaram prezidentimizga rahmat aytamiz. Bu ishlarning barchasi Siz aziz o‘qituvchilar, ustozlar uchun”, — deydi shahar hokimi.
Chirchiq shahar xalq ta’limi bo‘limi mudiri Nazokat O‘razovaning ma’lumot berishicha, xalq ta’limi binosi ta’miri uchun 750 million so‘m sarflangan bo‘lsa, bayram arafasida mahalliy budjet mablag‘lari hisobidan 398 million so‘mga eng zamonaviy rusumdagi kompyuter texnikalari olib berilgan.
Mas’ulning qo‘shimcha qilishicha, 1956-yilda qurilgan bino o‘tgan yillar davomida umuman kapital ta’mirlanmagan.
“Hurmatli prezidentimiz hokimlarga topshiriq berib, hokim bir vaqtning o‘zida xalq ta’limi bo‘limi mudiri ham deya ta’kidlaganlaridan so‘ng, shahar hokimi binomizga kelib, bino xarobaligidan hayratga tushgandi. Va “hokim ham shu binoda o‘tiradimi”, deya hazil qilgandi. Shundan so‘ng mas’ullarga topshiriq berib, xalq ta’limi fidoyilari zamonaviy, barcha qulayliklarga ega binoda ishlashlari kerak degandi. Mana ko‘rib turibsiz, bugun shunday binoga ega bo‘ldik”, — deydi Nazokat O‘razova.
Tadbir davomida Davron Hidoyatovga ta’limga e’tibori sabab viloyat xalq ta’limi boshqarmasining tashakkurnomasi topshirildi.
Tadbirning rasmiy qismidan so‘ng shahardagi “Kimyogarlar” madaniyat saroyida o‘qituvchi va murabbiylarga bag‘ishlangan konsert dasturi namoyish etildi.
Izoh (0)