Ўзбекистон коррупцияни тийиб туриш индикаторида 208 мамлакат ичида 161-ўринни эгаллади

Жорий йилнинг 23 сентябрь куни Бошқарув сифати индикаторларининг (Worldwide Governance Indicatorс) 2021 йил якунлари бўйича натижалар эълон қилинди. Бу ҳақда «Янги Ўзбекистон» хабар қилди.

Қайд этилишича, бошқарув сифати индикаторларини шакллантиришда умумий ҳисобда 30 та ахборот манбаларидан фойдаланилади. Ўзбекистоннинг кўрсаткичларини ҳисоблашда олдинги йилдан фарқли равишда 16 та («The Economist Intelligence Unit», «Freedom House», Осиё тараққиёти банки, АҚШ давлат департаменти, Бертелсман фонди ва бошқа кўплаб ташкилотлар) ахборот манбасидан фойдаланилган. Ўзбекистонни баҳолашда янги қўшилган ахборот манбаси сифатида «Сиёсий хавф хизматлари халқаро мамлакат рисклари бўйича қўлланмаси» маълумотларидан фойдаланилган.

Янгиланган рейтинг натижаларига кўра, Ўзбекистоннинг барча 6 та индикаторларидаги натижалари сезиларли даражада ўсди. Жумладан, «Ҳукумат самарадорлиги» кўрсатгичида Ўзбекистон 208 та мамлакат орасида 116-ўринни эгаллаб, аввалги натижасини 22 поғонагаяхшилади. «Сиёсий барқарорлик ва зўравонлик/терроризимнинг мавжуд эмаслиги» кўрсаткичида натижа 19 поғонага ўсиб 130-ўринда қайд этилди.

«Тартибга солиш сифати» йўналишида республиканинг ўрни 33 поғонага ўсди. Бу борада Ўзбекистон 144-ўринда қайд этилди.

Мамлакатнинг «Коррупцияни тийиб туриш» индикаторидаги натижаси 15 поғонага яхшиланиб 161-ўринда қайд этилган.

«Ҳуқуқ устуворлиги» йўналишида мамлакат 168-ўрин (+13 поғона), «Аҳоли фикрини ҳисобга олиш ва ҳисобдорлик» кўрсаткичи бўйича 182-ўринда (+12 поғона) қайд этилди.