24 сентябрь куни Қозоғистон ўзбеклари этномаданий жамоат бирлашмалари «Дўстлик» ҳамжамияти билан ҳамкорликда Чимкент шаҳрида Ўзбекистон туристик ярмаркаси ташкил этилди. Ушбу тадбир муносабати билан Туризм ва маданий мерос вазирлиги томонидан ОАВ вакиллари учун пресс-тур ташкил этилди, деб хабар бермоқда «Дарё» мухбири.
Ўзбекистон ва Қозоғистон ўртасида дипломатик алоқалар ўрнатилганининг 30 йиллиги муносабати билан ташкил этиган тадбирда Ўзбекистон Республикаси Вазирлар Маҳкамаси ҳузуридаги миллатлараро муносабатлар ва хорижий мамлакатлар билан дўстлик алоқалари қўмитаси ходимлари, Қозоғистон халқи ассамблеяси, Чимкент шаҳри ҳокимияти, Қозоғистон ўзбеклари этномаданий бирлашмалари «Дўстлик» ҳамжамияти, Ўзбекистоннинг Қозоғистондаги Бош консулхонаси вакиллари, шунингдек, Қирғизистон, Тожикистон ва Ўзбекистондан 50 нафардан ортиқ ўзбек миллати ҳамда ҳамкор ташкилотлар вакиллари иштирок этди.
Тадбирда Ўзбекистонда хизмат кўрсатган санъаткорлар ҳамда маданият ходимлари ўзбек миллий қўшиқларини ижро этди.
Тадбир давомида ўзбек миллий либослари кўргазмаси ҳам ўтказилди.
Ярмаркада ўзбек маданиятини акс эттирувчи миллий чолғу асбоблар, мусиқа ва рақс, миллий либослар, адабиёт асарлари кўргазмалари ташкил этилди.
Ушбу туризм ярмаркаси Ўзбекистоннинг туристик салоҳиятини намойиш этиш, миллатлар ўртасида дўстона алоқаларни мустаҳкамлаш, қозоғистонлик туристларни оқимини ошириш ҳамда икки давлат ўртасида дипломатик муносабатлар ўрнатилганига 30 йил тўлиши муносабати билан ташкиллаштирилди.
Ўзбек миллий ошхонаси таомларини намойиш этиш мақсадида Ўзбекистон Туризм ва маданий мерос вазирлиги буюртмасига асосан чимкентлик ошпазлар томонидан 100 килограмм ош тайёрлаб, тадбир иштирокчилари ва меҳмонларга тортилди.
Изоҳ (0)