«Ҳомиладор ҳолимда бошқа эркакка кўзимни сузишим керак экан» — актриса Хонзода Қамбарова «Аристократлар» жамоасини танлагани ва 500 минг сўм маош олаётгани ҳақида (видео)

«Дарё» нашрининг YouTube’даги каналида актриса ва блогер Хонзода Қамбарова билан суҳбат уюштирилди. Жаҳонгир Хўжаевнинг таклифи ва «Аристократлар»дан 500 минг сўм ҳақ олгани ҳақида сўзлаб берди.

— Жаҳонгир билан аввалдан танишмиз. Бир-икки марта «Аристократлар» кўрсатувига меҳмон сифатида чақиришгандан кейин «Жамоага қабул қиласизларми, шунчаки иштирок этиб юравермайман-ку?», дедим. Бўлмаса, Отабек Мирзахолов билан гаплашиб, яна «Браво» жамоасида иштирок этаман, деб режалаштиргандим. Чунки «Браво» жамоасининг 2019 йилги концерт дастурида иштирок этиб, тажриба орттирганман. Жаҳонгир Хўжаев «Агар бизнинг жамоада иштирок этсангиз, бошқа концертларда иштирок этолмайсиз», деди.

Шундан кейин «Аристократ»лар жамоасини танладим. Аммо ҳали «ярқ» этиб кўзга кўринадиган рол ижро этганим йўқ. Чунки жамоа катта рол беришдан аввал мени синаши, феъл-атворимни ўрганиши керак. Жамоа аъзолари келаётган йил бошида концерт беришни режалаштиришяпти. Мен эса иккинчи фарзандимни январь ойида дунёга келтираман. Агар соғлигим кўтарса, концертда иштирок этаман, — дейди Хонзода Қамбарова.

Ҳамиша сериал режиссёрларининг кам гонорар беришидан нолийдиган актриса «Аристократлар» жамоасидан ҳам кўп ҳақ олмаётгани ҳақида сўзлаб берди.

— Ўзим ёқтирган жамоа билан ишлаш завқ бағишлайди. «Аристократлар» жамоасидагилар билан деярли тенгдошмиз. «Браво»даги йигитлар юлдузлик касалиги чалинишган, бу гапни ўзларига ҳам айта оламан.

«Аристократлар» жамоасидаги йигитлар эса ичиб турган сувини ҳам бир-бирига илинади. Аҳил ва меҳнатсевар ижодкорлар билан ишлаганда, пулни асосий планга қўймайман. Ўзим ёқтирмаган ишни қилганимда эса, албатта, катта гонорар олишни ўйлайман. Чунки сарфлаган вақтим ва меҳнатимга яраша иккисидан бирини олишим керак-ку. Жамоадаги бир ойлик иштироким учун 500 минг сўм гонорар олдим. Аммо қувониб кетдим, бу жамоадан олган биринчи ойлигим эди.Сериалларга ҳам кўп таклиф этишади.

Яқинда ҳам 300 ва 500 вароқли сериал сценарийларини ўқиб чиқдим. Икки сценарийда ҳам интрига ва мантиқ йўқ. Сценарийни ўқиш учун сарфлаган вақтимга ачиндим. Менга беришмоқчи бўлган персонаждаги аёл ҳомиладор ҳолида бир нечта эркакларга кўзини сузиши керак экан. Қанақасига бу мантиққа тўғри келмайди-ку, деб рад жавобини бердим, — дейди актриса ва блогер Хонзода Қамбарова.

Мавзуга доир:

• «Абу-сахийда дўконма-дўкон юриб, косметика сотардим» — Хонзода машҳур бўлгунича нима иш қилгани ҳамда инстаблогерлар одамларни қандай алдаши ҳақида (видео)
• «Қайнонамга санъаткор эканим ёқмади». Блогер Хонзода эри билан яшамаётгани, бир ойлик даромади ва сериаллардаги ролларни сотиб олишаётгани ҳақида