Ўзбекистон ва Корея Республикаси ўртасидаги дипломатик муносабатлар ўрнатилганлигининг 30 йиллигига бағишлаб Тошкентда илк марта 24—25 сентябрь кунлари Mokkoji Korea Бутунжаҳон Корея маданияти фестивали ўтказилди.
2022 йилда офлайн тарзда ташкил этилган тадбир мамлакатлари сифатида Ўзбекистон ва Малайзия танланди. Қолган барча мамлакатлар фестивални онлайн тарзда кузатиб борди.
Фестиваль давомида мухлислар машҳур K-pop артистлари билан мулоқот қилиш, Халлю мухлислари эса кўргазма ва тадбирларга бепул ташриф буюриш, корейс халқи турмуш тарзи ва маданияти билан яқиндан танишиш имконига эга бўлди. 2020 ва 2021 йилларда пандемия сабабли Mokkoji Korea онлайн ўтказилган бўлиб, унда Мьянма, Филиппин, Қозоғистон, Россия, Ҳиндистон, Индонезия мамлакатлари иштирок этган. «Моккожи» (모꼬지) корейс тилидан таржима қилганда «ҳамкорликда учрашув, базм ташкил қилиш» маъносини билдиради. «Халлю» эса Жанубий Корея замонавий маданиятининг бутун дунё бўйлаб тарқалишини билдирадиган атама саналади.
Умуман, корейс маданияти шинавандалари ушбу фестиваль мобайнида– машҳур K-pop артистлар билан Hi-Five фан-учрашувлар;– машҳур сериалларнинг костюмларини кийиб кўриш имконияти бериладиган Корея дорамалари кўргазмаси;– вебтунлар (Жанубий Корея рақамли комикслари) кўргазмаси;– Корея таомларининг дегустацияси;– Моккожи-маркет;– рақс танловларида иштирок этишди.
25 сентябрь куни бўлиб ўтган якуний концертда EХО гуруҳи қўшиқчиси, рэпер, актёр ва раққос Кай, қўшиқчи Аilее, F.able гуруҳи иштирок этишди. Шунингдек Халлю мухлислари учун Корея ва Ўзбекистон маданиятига бағишланган «кичик муҳокамалар» бўлиб ўтди. Айтиш керакки, K-pop концертга чипталар сотилмади, балки фестиваль сайтида ўйналди. Ғолиблар ариза берган даъвогарлар орасидан тасодифий тарзда танлаб аниқланди. Биринчи ўйин 17 август, кейинги ўйинлар эса 31- август ва 7 сентябрда бўлиб ўтди. Чипталарни 24 ва 25 сентябрь кунлари кўргазма вақтида ўтказилган танловларда иштирок этиб ҳам ютиб олиш мумкин эди.
Фестиваль эндиликда 12 ноябрда Малайзиянинг Куала-Лумпур шаҳрида давом этади.
Изоҳ (0)